Waosan: Yokanan 1 : 6 – 8, 19 – 28 | Pamuji: KPJ. 451 : 1
Nats: “Penjenengane iku dudu Sang Padhang piyambak, mung kapatah nekseni bab Sang Padhang.” (Ayat 8)
Sawetawis kita tamtu boten asing kaliyan Bunda Teresa. Bunda Teresa punika satunggaling aktivis sosial ing Kalkuta, India. Wonten ing taun 1970-an, Bunda Teresa dados kondhang ing saindenging jagad awit marupi-rupi pakaryan sosial kangge nulungi kathah tiyang ingkang kasrakat lan sekeng. Saderengipun Bunda Teresa seda, piyambakipun sampun nindakaken 610 misi dhateng 124 negara, kalebet nampung lan ndamelaken papan kangge tiyang ingkang nandhang HIV/AIDS, lepra, lan TBC. Bunda Teresa nampi marupi-rupi penghargaan, kalebet saking pamrentah India inggih punika Bharat Ratna (1980) lan Nobel Perdamaian (1979). Bunda Teresa sampun nindakaken kathah pakaryan ingkang kaalembana dening tiyang kathah, ananging piyambakipun nate ngandhika mekaten: “Aku hanyalah sebuah pensil kecil di tangan Allah, Sang Penulis, yang sedang mengirimkan surat cinta-Nya kepada dunia.” Bunda Teresa rumaos bilih punapa ingkang sampun katindakaken sadaya punika sanes karana kasagedanipun, ananging karana dipun agem dening Gusti Allah. Bunda Teresa boten purun nggung-gungaken dhirinipun minangka ingkang paling berjasa.
Waosan dinten punika ngajak dhateng kita sinau saking Yokanan Pambaptis. Tiyang saking pundi-pundi papan kalebet Yudea sami nuju dhateng Yordan saperlu kabaptis. Kathah tiyang ingkang mastani bilih piyambakipun punika Sang Kristus (Mesias) ingkang dipun anti-anti dening tiyang Yahudi (Ay. 25). Wonten ugi ingkang mastani bilih piyambakipun Nabi Elia ingkang badhe jumeneng malih dados nabi tumraping tiyang Yahudi (Ay. 25). Estunipun tumrap Yokanan Pambaptis punika saged dados adakan ndadosaken naminipun misuwur. Ewasemanten piyambakipun mangertos lan rumaos bilih piyambakipun saderma utusan. Wonten ing ayat 7 sinerat, “Ana priya rawuh kautus dening Allah asmane Yokanan. Rawuhe dadi seksi, kapatah nekseni Sang Padhang supaya dadia lantarane wong kabeh padha pracaya.” Yokanan Pambaptis boten ngunggulaken dhirinipun minangka Putranipun Allah. Piyambakipun ngrumaosi bilih namung utusan kangge nyawisaken rawuhipun Sang Kristus.
Kadangkala ing salebeting peladosan, nalika kita dipun alem dening tiyang, bab punika lajeng ndadosaken kita gumunggung. Sinau saking waosan dinten punika, sumangga kita nuladha punapa ingkang katindakaken dening Yokanan Pambaptis. Piyambakipun ngrumaosi bilih sadaya punika namung sarana pakaryanipun Allah. Namung Gusti Allah ingkang pantes pinuji-puji. Amin. [ANS].
“Tansah lelados kanthi lembah ing manah.”
