Waosan : Wilangan 22 : 1 – 21 | Pamuji : KPJ. 300 : 1, 2
Nats: “Nanging Bileam mangsuli marang utusane Sang Prabu Balak : “Sanadyan Sang Prabu Balak maringna salaka lan mas sakadhatonipun kebak, ewadene kula boten saged nindakaken punapa-punapa, ingkang sapele punapa ingkang wigatos, ingkang nerak dhawuh timbalanipun Pangeran Yehuwah Gusti Allah kula.” (Ay. 18)
Wonten setunggaling penelitian arkeologi ing Tell Der Alla Yordania (rumiyin wilayah Moab) ingkang manggihaken seratan ing gowa ngangge tinta abrit lan ireng. Seratan punika mekaten, “Kitab Bileam, anak Beor, paningal ilah-ilah”. Saking prasasti punika nedahaken bilih Bileam saestu nate gesang lan dados nabi jaman semanten. Sinten Bileam punika? Bileam punika juru tenung ingkang dipun printah Balak prabu Moab kangge nyenyamah bangsa Israel. Bileam sanes tiyang Israel nanging piyambakipun pitados dhateng Gusti Allahipun bangsa Israel lan saged wicantenan kaliyan Gusti Allah.
Waosan kita nyariosaken bangsa Israel ingkang badhe lumebet ing tanah Kanaan. Kangge lumebet ing Kanaan, bangsa Israel kedah ngadepi bangsa Moab. Nalika Prabu Balak mangertos bangsa Israel sampun wonten daerah Moab, piyambakipun ngutus utusanipun dhateng Bileam saperlu nyuwun tulung supados nyenyamah (mengutuki) bangsa Israel. Wiwitanipun Bileam boten purun awit piyambakipun pitados dhateng Gusti Allah. Prabu Balak lajeng ngutus malih utusanipun kaping kalih. Ing ngriku Bileam lajeng ngetut utusan prabu Balak punika. Nalika Balak mrintah Bileam supados nyenyamah bangsa Israel, Bileam boten saged nyenyamah bangsa Israel nanging malah mberkahi Bangsa Israel. Bileam ngakeni bilih piyambakipun boten wantun nerak pangandikanipun Gusti Allah.
Saking cariyos Bileam punika, Gusti ngersaaken supados pitutur lan pangucap kita tansah memuji lan ngluhuraken asmanipun Gusti. Pangucap kita, inggih punika pangucap berkah. Pangucap ingkang boten natu manahipun tiyang sanes nanging pangucap ingkang saged ngiyatken, nglipur saha nentremaken manah tiyang sanes. Sampun ngantos kita dawah ing dosa karana pangucap kita ingkang boten sae lan mbangun. Sampun ngantos kita namung rerasan, namung pados lepating sesami kita. Mangga kita saged kados Bileam ingkang setya nindakaken punapa ingkang dados karsanipun Gusti, tansah nuwuhaken pangucap berkah ing salebeting gesang kita. (AR).
“Pangucap ingkang tulus lan mbangun dadosaken berkah kangge sesami”
