Waosan : Lukas 19 : 45 – 48 | Nats : Ayat 45 | Pamuji : KPK 32 : 1, 2
Riyadin Undhuh-undhuh wekdal anggen kita misungsungaken sedaya berkah mirunggan asil saking pametuning bumi. Menawi warga GKJW ing kitha kanthi misungsungaken asil saking gaji utawi dagangan. Riyadin Undhuh-undhuh katata kanthi maneka warni cara, salah satungalipun kanthi tata cara lelangan. Wonten ingkang nggadhahi pemanggih bilih lelangan punika proses dol-tinuku ingkang ndadosaken Gusti Yesus duka kados waosan ing dinten punika. Mangga sesarengan kita gatosaken punapa ingkang ndadosaken Gusti Yesus duka lan nundhungi tiyang ingkang dedagangan ing Pedaleman Suci?
Umat ingkang badhe ngibadah wonten Ing Padaleman Suci punika saking pundi-pundi papan. Lan tiyang-tiyang punika boten badhe keraya-raya mbekta korban saking griya ingkang tebih kala wau. Mila lajeng tumbas ing sakiwa tengenipun Padaleman Suci. Ing Padaleman Suci para Imam sampun nyawisaken kewan korban, ananging kanthi regi ingkang inggil sanget, lan asilipun masuk kantong pribadi.
Gusti Yesus duka amargi wonten praktek-praktek kanthi kedhok misungsungaken kurban, ingkang boten kangge kamulyanipun Gusti. Ketingalipun lelados mitulungi tiyang nyaosaken kurban kagem Gusti, ananging kangge kepentingan sagelintir tiyang kemawon. Kamangka Padaleman Suci punika papan kangge ngluhuraken asmanipun Gusti Allah piyambak.
Lajeng kados pundi tata cara lelang? Punapa punika sanes dol-tinuku ing greja? Inggih, pancen tata caranipun dol-tinuku, ananging boten sami kaliyan pemahaman dol-tinuku ing njawi. Dol-tinukunipun sanes kasurung kabetahan, ananging semangat misungsung kagem pakaryanipun Gusti Allah piyambak. Dene dukanipun Gusti punika kedah dados pangemut dhateng kita supados punapa kemawon tata caranipun ngucap sokur, sampun ngantos nggeser kursi kamulyanipun Gusti Allah kanthi jor-joran, ngetingalaken kasugihan. Menawi semangat misungsung sampun kageser, ngatos-atos menawi Gusti duka lan boten nampi sedaya pangucap sokur kita karana katingalan cacat ing ngarsanipun. [PKS]
“Undhuh-undhuh: Gusti kang ngundhuh kamulyane.”
