Waosan : Matius 7 : 15– 20 | Pamuji : KPK 134 : 1,2,4 : 1, 3/KPJ 136 : 1,3,4
Nats: “Wong-wong mau bakal katitik saka wohe.” (ayat 20)
Menapa wonten wit anggur nguwoh wuni (woh ingkang kecut) utawi swalikipun wit wuni nguwoh anggur? Mesthi boten wonten. Menika nggambaraken bilih lelampahan sae boten nate medal saking tiyang awon, utawi lelampahan awon boten thukul saking tiyang sae.
Waosan kita menika wujud kritik-ipun Gusti Yesus kangge para nabi palsu. Kalepatanipun nabi palsu inggih menika, namung pados untung kangge dhirinipun pribadi. Pangon ingkang sae mesthi nggatosaken para mendanipun, katimbang gesangipun piyambak. Asu ajak namung nengenaken napsu srakahipun piyambak. Para nabi palsu ugi paring piwulang. Ananging piyambakipun mulang boten paring kangge tiyang sanes, malah kepengin pikantuk menapa kemawon saking tiyang sanes.
Kasaenan lan ajining pakaryan ukuranipun sanes pikantuk pituwas pinten, ananging saking pambudidaya mbikak pikiranipun tiyang sanes supados nampeni kayekten. Pambudidaya mekaten menika lelampahan ingkang saestu aji. Para nabi palsu biasanipun kepengin kawentar piyambak, nanging nabi sejati boten kepengin piyambakipun kawentar.
Kepalsuan asilipun namung kangge lair kemawon, sanes ngantos ing batin. Nanging ingkang sejati inggih lair lan batos ing saranduning gesang, temah murakabi tumrap sedaya ingkang lumampah.
Gusti Yesus ngersakaken ingkang mekaten, supados dadosa nabi ingkang murakabi sedaya ingkang lumampah, awit gesanging manungsa boten namung betah lair kemawon ananging lair trusing batin. Kita ugi sasaged-saged anggen kita nyambut damel, ugi ngabdi tujuanipun sanes namung kangge kabetahan lair kemawon ananging kabetahan batin ugi kita perdi, temah karsanipun Gusti lumampah ing gesang kita. Temah kita ingkang sampun sae karana pitados dhumateng Gusti Yesus, saged nguwoh ingkang sae. [Bpur]
“Buktekna kabecikanmu ing pamawas, pangucap lan patrap utama!”
