Waosan : Wulang Bebasan (Amsal) 6 : 6 – 23 | Pamuji : KPK 166
Nats: “He wong kesed, maranana semut, lakune titenana lan dadia pinter.” [ayat 6]
Semut menika kewan ingkang alit, tur gampil kemawon dipun padosi lan dipun cithes kemawon sampun pejah. Menapa ingkang saged dipun sinau saking semut, kewan alit menika? Pancen semut sami kemawon titah sawantah saking Gusti Allah. Ananging titahipun Gusti Allah mesthi nggadhahi keistimewaan, ingkang saged dipun sinau saking.
Waosan menika paring pepenget kawicaksanan kangge para murid. Saking waosan menika kita saged nampeni pepenget ingkang kathah. Ayat 1-5 pepenget ngengingi dados penanggel sesami, ayat 6-11 ngengingi tiyang ingkang kesed, ayat 12- 15 tingkah polahipun pangrantam, lan ayat 16- 19 pepenget mirunggan bab nem perkawis ingkang dipun sengiti Pangeran Yehuwah, pungkasan ayat 20-35 pepenget ngengingi laku bandrek.
Pepenget bab patuladhanipun semut karana semut menika kewan ingkang sregep tur disiplin. Murid ingkang kesed kapurih migatosaken semut kados pundi tingkah polahipun, temah saged mendhet piwulang saking pasinaon menika. Kanthi mirunggan ingkang saged dipun sinau saking semut kados isinipun ayat 7 lan 8. Sanadyan semut boten wonten igkang mimpin, ingkang ngatur lan mandhegani, nanging piyambakipun nyambut damel piyambak-piyambak kanthi kanthi maksimal.
Ingkang kepengin dipun paringaken saking guru kawicaksanan inggih menika bilih semut tanpa pemimpin, boten wonten ingkang ngatur, semut saged ngetingalaken kedisiplinan dhiri. Semut saged nyambut damel kanthi maksimal karana saben semut nggadhahi kedisiplinan dhiri ingkang mirunggan. Piwulang saking semut menika boten namung saking sregepipun lan kedisipilnanipun kemawon, nanging ugi karana wareg rejeki. Ing Wulang Bebasan, barang darbe saha kemlaratan mesthi kagambaraken wareg rejeki lan kemlaratan (12:11; 20: 13; 28: 19). Boten wonten cariyos semut tilem lan keluwen, malah mesthi kacekapan. Ing mangsa tartamtu semut boten saged nyambut damel, pramila lajeng mranata tumindakipun. Menawi semut kemawon saged. Menapa malih manungsa. [Bpur]
“Sing sapa sregep, mesthi wareg.”
