Waosan : Para Hakim 16:23-31 | Pamuji:KPK 89:1,2, KPJ 160:1,2
Nats: “Sang Simson banjur sesambat marang Pangeran Yehuwah, unjuke: “Dhuh Pangéran Yehuwah; Paduka mugi karsaa ngengeti kawula. Saha kawula mugi Paduka kiyataken namung sepisan punika kemawon,…” [ayat 28]
Simson menika tiyang ingkang kondhang rosa karana kekiyatanipun. Ananging ing waosan kita menika cetha bilih daya kekiyatanipun Simson sampun ical, karana pengapesanipun sampun konangan malah ugi kados sampun dipun icali kekiyatanipun. Inggih menika cukur rambut. Awit pancen saderengipun Simson lair Gusti Allah sampun dhawuh dhateng ibunipun: “Amarga kowe bakal ngandhut lan duwe anak lanang; iku sirahe ora kena kagepok ing lading panyukuran, awit bocah iku wiwit ana ing guwa-garbane ibune bakal dadi nazir sengkerane Gusti Allah, sarta bakal miwiti ngluwari Israel saka ing tangane wong Filisti.” (Para Hakim 13: 5)
Inggih karana saking glembuk manis saking Delila semahipun, pengapesnipun Simson ngantos dipun cariyaosaken. Pramila kedadosan saestu kekiyatanipun menika ical, kados paribasan kadya wayang kelangan gapite. Awit wayang kulit menika kekiyatanipun saking gapitipun. Mila menawi wayang kulit tanpa gapit, nglemprek boten nggadhahi kekiyatan. Kados mekaten ugi manungsa menawi sampun dipun wastani kadya wayang kelangan gapite, tiyang menika lemes boten nggadhahi kekiyatan.
Menawi Simson ngantos matur kanthi adreng ing ngarsanipun Gusti, cetha bilih sedaya kekiyatan sumberipun namung saking Gusti Allah ingkang prakosa. Pramila Simson nyuwun saking sumbering kekiyatan menika lan dipun paringi kekiyatan ingkang ngedab-edabi. Kita kadhang kala ing salebeting gesang ugi ngraosaken loyo, kados boten nggadhahi kekiyatan. Malah karana saking sadhengah sebab kita kadya wayang kelangan gapite. Menawi mekaten kawontenanipun, suamangga enggal sowan ing ngarsanipun Gusti Allah ing pandonga, supados kita nampeni panangapunten lan dipun pulihaken kekiyatan kita. [Bpur]
“Kawontenanipun manungsa menawi sampun kecalan kekiyatan, loyo. Nanging Gusti mesthi badhe paring kekiyatan, angger nyenyuwun kanthi adreng lan pakering.”
