Waosan : 2 Timotius 3 : 10 – 15 | Pamuji : KPK 3 : 1, 3
Nats: “Kowé wis nyipati dhéwé enggonku dianiaya lan disangsara. Kowé wis nyipati dhéwé kabèh sing wis kelakon tumraping aku ana ing kutha-kutha Antiokia, Ikonium, lan Listra, yakuwi panganiaya-panganiaya nggegirisi sing wis dakalami. Nanging Gusti wis ngluwari aku saka kuwi mau kabèh.” [ayat 11]
Dinten menika dinten pengetan Sumpah Pemuda. Sumpah Pemuda menika dipun kumandhangaken taun 1928 dening Konggres Pemuda ing Batavia nalika bangsa kita taksih dipun jegi dening Walandi. Ing jaman samanten tamtu bangsa kita ngalami kasangsaran ingkang ageng ing rehing penjajah, Walandi. Ing satengahing kasangsaran menika para nem-nemaning bangsa kita sami ngumandhangaken kesatuan bangsa, tanah tumpah dharah lan basa Indonesia. Wusananipun bangsa Indonesia nyatunggil lan mardika awit sih rahmatipun Gusti. Dinten Sumpah Pemuda dipun pengeti saben taun supados kita enget dhateng kasangsaran lan perjuanganipun para leluhur kita, supados kita nglestantunaken semangat kesatuan menika.
Timotius dipun dhawuhi supados ngengeti kathahing kasangsaran ingkang dipun alami dening Rasul Paulus. Ingkang kadhawuhaken supados dipun engeti boten namung kasangsaranipun Paulus, nanging langkung-langkung pakaryan lan pitulunganipun Gusti ingkang sampun ngluwari Paulus saking kasangsaranipun. Pepengetipun Paulus menika kadhawuhaken supados Timotius cumadhang ngalami kasangsaran anggenipun ndherek Gusti, lelados ing pakaryanipun Gusti. Karsanipun Paulus, supados Timotius ingkang taksih anem menika boten namung ngajengaken sekecaning gesang. Pepengetipun Paulus menika wigatos karana tiyang anem menika remenanipun kasenengan, lan menawi nemahi pakewet lan kasangsaran lajeng gampil mupus (putus asa). Paulus ngengetaken bilih Gusti mesthi paring kekiyatan lan pitulungan.
Pepengetipun Rasul Paulus menika samangke katujokaken dhateng kita. Menawi kita saweg ngalami kasangsaran, sumangga kita enget bukti pitulunganipun Gusti dhateng sedaya pendherekipun ingkang setya. Manah ingkang cumadhang nandhang sangsara menika sumangga tansah kita gadhahi lan kita tularaken dhateng nem-nemaning greja kita. [st]
“Luwih becik sangsara kanggo mulya.”
