Waosan: Yusak 6 : 1 – 21 | Pamuji: KPJ. 144
Nats: “Sang Yehuwah ngandika marang Senapati Yusak: Lah kutha Yerikho dalah ratu lan para pahlawane kang gagah prakosa Sunulungake ing tanganira.” (Ayat 2)
Jargon “pancen oye” punika kawentar sanget ing taun 90-an, lumantar iklan obat sakit kepala ingkang dipun paragakaken dening Ki Mantep Soedarsono. Menawi kita raosaken tembung jargon punika ngemu teges, wonten salah satunggaling obat ingkang cespleng lan mujarab kangge tiyang ingkang sakit sirahipun. Mekaten ugi kanggenipun tiyang pitados wonten pribadi ingkang ‘pancen oye’ kuwaos anggen ngrengkuh gesang para kagunganipun, inggih punika Gusti Yesus.
Kawontenanipun kutha Yerikho punika dipun kupengi kaliyan tembok ingkang kiyat, mokal kangge bangsa Israel saged nembus tembok punika. Pancen bangsa Israel mboten nggadhah piranti gaman ingkang canggih, nanging bangsa Israel nggadhah Gusti Allah ingkang saged nulungi bangsa Israel ing sadengah kahanan punika. Kutha Yerikho badhe dipun paringaken Gusti Allah dhateng bangsa Israel. Gusti Allah kagungan cara ingkang unik kagem mbombong bangsa Israel supados saged ngawonaken kutha Yerikho punika. Ing ngriki, Gusti Allah ngendika dhateng Senopati Yusak, para Imam ingkang cacahipun pitu lan para prajurit, supados ngupengi tembok kutha Yerikho punika. Srana pangwasanipun Gusti Allah, tembok kutha Yerikho punika sami rubuh. Bilih kita gatosaken prekawis ingkang dipun tindakaken dening Senapati Yusak lan bangsa Israel punika prastawa ingkang mokal miturut tatanan manungsa, nanging mboten wonten ingkang mokal kagem Gusti Allah.
Ing sauruting gesang kita, tamtu kita nate ngadepi prekawis gesang kados ‘tembok kutha Yerikho’. Tembok punika saged arupi momotan, kawontenan gesang ingkang awrat lan sanes-sanesipun. Malahan kita ngraosaken sampun mboten wonten malih margi kangge kita luwar saking awrating momotan gesang kita punika. Lajeng pitakenan kangge kita, “Punapa ingkang kedah kita tindakaken?” Kita saged sinau saking punapa ingkang dipun alami kaliyan Senopati Yusak lan bangsa Israel. Awit kapitadosanipun dhumateng Gusti Allah, Gusti Allah karsa paring pitulungan ingkang ngedap-edapi. Supados kita manggihaken gesang ingkang kebak kabingahan lan kawilujengan, sumangga kita tansah mbangun iman kapitadosan kanthi saestu. Iman kapitadosan ingkang tansah mandheng Gusti Allah, ingkang pitados bilih panguwaosipun Gusti Allah nglangkungi sedaya momotan gesang kita. Mangga kita tansah mantep ndherek Gusti Allah. “Gusti Allah pancen oye!” saged dados jargon ing gesang kita minangka tiyang pitados. Amin. [Bojes].
“Ndherek Gusti Allah punika ateges kita masrahaken gesang kita ing asta-Nipun Gusti”
