Waosan : Wulang Bebasan 22 : 1-2,8-9,22-23 I Pujian: KPK.174:1-3,KPJ .87 : 1,3.
Nats: ‘”Pilih jeneng kang becik tinimbang karo kasugihan gedhe, luwih becik nampani katresnan katimbang oleh salaka lan mas.” (ayat 1)
Saben tiyang sepuh mesthi kepingin paring tenger ingkang sae kangge anakipun ingkang nembe lair. Tenger utawi nami menika wujuding pandonga utawi pangajeng-ajeng kangge anak kalawau. Pramila wonten ingkang paring tenger anakipun : Widada, Wilujeng, Slamet. Kanthi tenger menika anak ing tembe dipun ajeng-ajeng nampeni wilujeng. Boten wonten ingkang lajeng paring tenger : Cilaka, Bebaya, ugi ukara sanes ingkang mujudaken kacilakan dhumateng anak ingkang nembe lair.
Kados mekaten, boboting nami lan katresnan mesthi langkung sae katimbang salaka. Temtu bab menika boten ateges ngremehaken bab bandha, nanging pepenget kangge para mudha menggahing kawicaksanan bilih andhap asor saha ajrih asih ing ngarsanipun Gusti Allah kedah dipun perdi. Pramila Sang guru kawicaksanan ngandharaken bilih bandha badhe langkung migunani menawi dipun sarengi kaliyan gesang kanthi andhap asor lan ajrih asih ing ngarsanipun Gusti Allah. Awit bandha ingkang asal saking nyenyolong, badhe ndhatengaken cilaka. Nami ingkang sae, nglangkungi bandha ingkang kathah. Wonten ing Kitab Kohelet 7:1 kasebataken :” Jeneng kang arum iku luwih becik katimbang karo lenga kang larang, lan dinaning ngajal iku luwih bacik tinimbang karo dina kalairan”. Bandha dereng mesthi dados reputasi sosial nanging saged ngrisak. Nami ingkang arum malah saged ngangkat reputasi sosial. Langkung sae nampeni katresnan katimbang nampeni salaka lan mas. Nami ingkang arum menika sami kaliyan katresnan awit kekalihipun menika wohing kawicaksanan. Sami kemawon nami, katresnan, salaka lan mas menika wohing kawicaksanan ananging sedaya bandha kirang maedahi menawi kabandhingaken kaliyan nami arum lan katresnan.
Nami, katresnan lan bandha donya menika wohing kawicaksanan, nanging kedah dipun sarengi andhap asor sarta ajrih asih ing Gusti ingkang murbeng dumadi. Menapa malih menawi nami menika kacundhukaken kaliyan asma Gusti Yesus Kristus, mesthi sedaya badhe wilujeng. [Bpur]
“Nami lan katresnan, ngungkuli bandha donya kang akeh”
