Waosan: 1 Timotius 6 : 13 – 16 | Pamuji: KPJ. 106 : 1 – 3
Nats: “Pakon iki tetepana ditanpa cacad lan tanpa sisip, kongsi tumekaning titimangsane Gusti kita Yesus Kristus ngatingal.” (Ayat 14)
Bal-balan punika salah satunggaling cabang olah raga ingkang dipun remeni tiyang kathah. Tiyang ingkang fanatik kaliyan tim bal-balanipun mboten eman ngedalaken arto kangge tumbas tiket, kangge dukung timipun supados menang. Mekaten ugi nalika tanding, mbetahaken strategi lan kerjasama ingkang sae supados saged menang. Sedaya pemain nggadhah peran penting, mila mboten saged striker rumaos paling penting piyambak tinimbang kiper lan para pemain sanesipun awit sedaya kedah kompak, mboten namung mikiraken dhirinipun piyambak. Mekaten ugi tumrap YBPK minangka lembaga pendidikan GKJW. Sedaya perangan ing YBPK kedah nyatunggil, makarya sesarengan, nata program lan strategi ingkang sae kangge ngadepi tantangan jaman ingkang sansaya ewet.
Waosan kita dinten punika nyariosaken panggulawentahipun Rasul Paulus dhateng Timotius. Ing seratipun Rasul Paulus nyebat Timotius punika manungsaning Allah. Tegesipun Timotius punika abdinipun Allah ingkang kedah nindakaken kaadilan, kamursidan, kasetyan, katresnan, kasabaran, lan budi sareh ing salebeting gesangipun (Ay. 11). Timotius kedah dados tuladha kangge warga pasamuwan sarta nindakaken karsanipun Gusti. Paulus ngengetaken Timotius supados nglampahi tetandingan iman, nggayuh gesang langgeng, lan netepi sahadat ingkang bener (Ay. 12). Sedaya ingkang dados angger-anggeripun Gusti kedah dipun tindakaken tanpa cacad lan tanpa sisip ngantos rawuhipun Sang Kristus (Ay. 14). Ing ngriki Paulus ngersakaken Timotius tansah njagi kasetyanipun dhumeteng Gusti Allah.
Panggulawentahipun Paulus dhateng Timotius punika ugi dados panggulawentah dhateng kita lan YBPK. YBPK dipun timbali Gusti dados manungsaning Allah, inggih punika netepi dawuhipun Gusti sarta nindakaken karsanipun Gusti. Pancen mboten gampil kangge nindakaken kaadilan, kamursidan, kasetyan, katresnan, kasabaran, lan budi sareh ngangge kakiyatan kita piyambak. Karana punika, kita kedah nyuwun kakiyatan saha pitulungan saking Gusti Allah supados kita saged nindakaken punapa ingkang dados karsa-Nipun. Sumangga kita terus ndukung YBPK sarana pandonga, materi, tenaga, lan pamikir kita kangge kemajenganipun YBPK. Mugi YBPK terus maju, terus merjuangaken pendidikan ing sae kagem kamulyanipun Gusti. Amin. [AR].
“YBPK dipun agem Gusti kagem nyatakaken kamulyanipun Allah ing donya.”
