Waosan: Yesaya 55 : 1 – 9 | Pamuji: KPJ. 84
Nats: “Wong duraka kareben ninggal dalane, lan wong ala cikben ninggal pangrantame; kareben mratobat marang Sang Yehuwah, mesthi bakal kaparingan sih-palimirma, sarta marang Gusti Allah kita, sabab Panjenengane bakal ngluberake pangaksamane.” (Ayat 7)
Biasanipun nalika manungsa sampun wonten ing kahanan ingkang nentremaken lan sampun biasa dipun alami, inggih awrat badhe medhal ngraosaken swasana enggal. Contonipun, karana sampun biasa bucal pawuhan ing lepen, dipun engetaken malah nesu. Punika kawastanan zona nyaman. Punapa klentu gesang ing zona nyaman? Tamtu mboten wonten lepatipun. Ingkang wigati kita kedah nyadari bilih zona nyaman punika mbetha kita dados tiyang ingkang mursid punapa mursal? Dadosaken kita tansaya cundhuk kaliyan karsanipun Gusti Allah, punapa nebih saking Gusti Allah?
Ewasemanten umat Israel ingkang wonten ing tanah Babil ngraosaken zona nyaman awit wekdal ingkang dangu dadosaken umat Israel saged adaptasi. Ananging prekawis punika justru dadosaken umat Israel tansaya tebih saking Gusti Allah. Umat Israel asring ningali tindak-tanduk tiyang Babil ingkang mboten cundhuk kaliyan karsanipun Allah, lajeng dipun conto, dipun tindakaken dening umat Israel lan rumaos biasa. Nyumerepi kawontenan punika, nabi Yesaya ngengetaken bilih sejatosipun umat Israel punika dipun timbali Gusti Allah kangge luwar saking Babil wangsul tumuju ing tlatah Yehuda. Pramila, prelu nyambeti prasetyanipun Gusti Allah kalawan nilaraken tumindak ala, mratobat, lan nilingaken talingan kangge mirengaken dhawuhipun Gusti Allah. Kanthi mekaten, umat Israel badhe nampi katentreman lan karahayon.
Lumantar reraosan punika, sumangga kita ingkang samangke wonten ing zona nyaman sami niti-priksa, punapa zona nyaman punika mbetha kita ing kamursidan punapa kamursalan? Ing wulan Pambangunan, kita kaajak kangge ngraosaken lumampahing patunggilan kita ing GKJW, Punapa kita sampun ngudi mbabaraken Kratoning Allah? punapa kita malah remen gesang ing zona nyaman, ngudi pepenginan kita piyambak? Menawi kita sampun nyadhari bilih zona nyaman ingkang kita lampahi punika nebih saking karsanipun Gusti Allah, sumangga kita mratobat. Kita nilaraken zona nyaman, wangsul dhateng Gusti Allah Sang Rama, nampeni sih-pangaksama. Sumangga kita lampahi gesang kanthi nggatosaken sedaya pepakenipun Gusti, mirengaken saha nindakaken dhawuhipun Gusti ing salebeting gesang paditenan, gesang sesrawungan, satemah kabingahan, katentreman saha karahayon tansah kababar lumantar gesang kita. Amin. [AW].
“Enggal sadhar, enggal wangsul dhateng Allah.”
