Waosan : Ayub 36 : 1 – 23 | Pamuji : KPJ. 42 : 3
Nats: “Kowe sing ngati-ati aja nganti madhep marang piala amarga iya iku kang njalari kowe kacoban dening sangsara”. (Ay. 21)
Penyakit Virus Corona ingkang dipun alami dening manungsa ing tahun 2020, kalebet mangsa pagebluk ingkang nyengsarakake gesangipun manungsa. Awit kathah sanget gunggungipun manungsa ingkang nandang sakit, kecalan padamelan, kecalan brayat, lsp. Kasangsaran punika nuwuhake kathah sanget piala ing satengahing masyarakat. Supados boten kenging penyakit Corona punika, saben tiyang kapurih sami nindakaken Sosial Distancing utawi sami jagi jarak kalian tiyang sanes. Lan nindakaken Isolasi mandiri (mboten pareng medal saking griya). Wanuh kalian protokol kesehatan arupi : ngagem masker, njagi kebersihan, dipun priksa suhu badanipun lsp. Bilih manungsa lena utawi ngremehake protokol kesehatan punika, piyambakipun saged kenging virus Corona punika.
Bilih nguningani gesangipun manungsa ing tahun 2020, kita kemutan kalian gesangipun Ayub ingkang mboten kayana-nyana nampi pacoben ingkang awrat arupi : kecalan brayat, raja kaya, rencang, lsp. Kita saged ngraosaken nalika manggihi perkawis punika Ayub mesthi ngraosaken sumelang, sedih lan sangsara. Sanadyan awrat, nanging Gusti Allah mboten nilaraken Ayub piyambakan. Elihu kaagem dening Gusti supados nglipur lan ngiyataken Ayub supados Ayub mboten ngadhepi momotan gesang kalawan kakiyatanipun piyambak. Awit Gusti Allah punika badhe maringi kakiyatan lan pepadhang supados anggenipun Ayub nandang kasangsaraan mboten ngantos nindakake piala lan dhawah wonten ing dosa.
Bilih kita sampun nate ngraosaken kaganjar kasangsaran, punika mboten sekeca. Mangga kita sami nuladha kados Ayub ingkang enggal mratobat dhumateng Gusti. Mekatena ugi kangge kita, kita mboten ngadhepi kasangsaran gesang kalian kakiyatan kita piyambak lan mboten lena ngantos nindakaken piala. Nanging mangga kita nyuwun panuntuning Gusti Allah, kita nyuwun dipun paringi akal – budi ingkang padhang supados saged nglangkungi sedaya kasangsaran sinarengan kaliyan Gusti. Matemah gesang kita tansah ayem lan tentrem sanadyan nampi momotan gesang ingkang awrat. (Ry)
“Tansah eling dumateng Gusti lan waspada bilih kaganjar kasangsaran supados kita katebihaken saking piala.”
