Waosan: Wilangan 11 : 16 – 23 | Pamuji: KPJ. 65
Nats: “Nanging pangandikane Sang Yehuwah marang Nabi Musa: “Apa ta pangwasane Pangeran Yehuwah iku kurang kanggo nindakake kang mangkono iku? Ing samengko sira bakal sumurup apa kang Sundhawuhake iku bakal kelakon tumrap sira kabeh!” (Ayat 23)
Zona nyaman inggih punika kahanan ingkang dipun raosaken ayem tentrem, aman, lan nyaman. Katahipun tiyang punika kepengin gesang wonten ing zona nyaman punika. Kahanan zona nyaman punika asring ndadosaken kita punika sisah maju utawi tuwuh ngrembaka karana sampun mandheg mboten purun medal saking zona nyaman punika. Nanging kanggenipun tiyang ingkang kepengin maju, piyambakipun kedah medal saking zona nyamanipun. Piyambakipun kedah wantun ngadepi kahanan ingkang rekaos, sisah, lan kebak tantangan. Sedaya punika saged dadosaken piyambakipun pribadi ingkang tanggon sarta tahan uji anggenipun ngadhepi maneka warni pakeweting gesang.
Mekaten ingkang dipun raosaken kaliyan bangsa Israel ing waosan kita. Bangsa Israel ingkang medal saking Mesir ngraosaken awrating gesang awit bangsa Israel kedah mlampah ing ara-ara samun. Kawontenan punika ingkang ndadosaken bangsa Israel sami sambat dhumateng Gusti awit tetedan ingkang mboten ngremenaken. Lajeng Gusti Allah paring dawuh dhateng Musa supados ngempalaken para pinitua Israel. Gusti Allah kersa maringaken Rohipun dhateng para pinitua Israel punika supados Musa mboten piyambakan anggenipun mimpin bangsa Israel punika. Selajengipun Gusti Allah ngendika bilih bangsa Israel badhe nampi berkah tetedhan arupi daging. Pangandikanipun Gusti punika mboten dadosaken umat Israel enggal pitados dhumateng Gusti, awit kathah sanget cacahipun bangsa Israel ingkang kedah dipun paringi daging. Ing ngriku, nabi Musa ngengetaken malih bilih pakaryanipun Gusti punika endah lan sedaya ingkang dipun dawuhaken badhe kelampahan.
Ing gesang kita padintenan tamtu kita nate ngraosaken gesang ingkang awrat karana kita medal saking zona nyaman kita. Swawi kita sinau saking pengalamanipun Bangsa Israel, kita pitados bilih pangrimatanipun Gusti Allah dhateng bangsa Israel ugi kelampahan ing gesang kita. Sumangga kita sami nyadari lan ngraosaken bilih Gusti Allah punika tansah nuntun lan ngrimati gesang kita. Mangga ing salebeting gesang kita padintenan, senadyan awrat kita pasrah dhumateng Gusti Allah. Kita ugi nyuwun berkah kakiyatan lan kawilujengan dhumeteng Gusti, awit namung wonten ing Gusti Yesus kemawon, kita sestu rinimatan lan raosaken sih rahmat-Ipun. Amin. [BWP].
“Kathah prekawis ingkang mboten pasti ing gesang kita, ananging panganthinipun Gusti Allah punika sampun pasti wonten ing gesang kita.”
