Waosan: Jabur 15 : 1 – 5 | Pamuji: KPJ. 96
Nats: “Kang ora nyebar pitenah kalawan ilate, sarta ora nindakake piala marang kancane, lan ora memada marang pepadhane.” (Ayat 3)
Punapa panjenengan nate mirengaken sawetawis motivator ingkang maringi semangat lan motivasi kangge para tiyang ingkang mirengaken piyambakipun? Tembung-tembung ingkang medhal saking tutukipun punika saged dados kakiyatan sarta daya kangge tiyang ingkang semplah, kecalan pangajeng-ajeng, sarta nyangi momotan. Kadosipun tembung-tembung punika saged ngowahi pemanggih ingkang negatif dados positif. Mila kathah tiyang ingkang asring ndherek kegiatan pelatihan utawi kegiatan motivasi punika, supados pikantuk pengalaman lan katrampilan kangge makarya lan usahanipun.
Sabda pangandikanipun Gusti dinten punika, nyariosaken paseksinipun Juru Mazmur bab Gusti Allah ingkang makarya salebeting gesangipun. Kawiwitan saking pitakenan Juru Mazmur, “Dhuh Yehuwah, sinten ingkang kepareng mondhok wonten ing tarub Paduka? Sinten ingkang kelilan manggen wonten ing redi Paduka ingkang suci?” (Ay. 1) Ing ngriku Juru Mazmur pikantuk wangsulan saking pitakenanipun punika. Kasebataken inggih punika: tiyang ingkang tanpa cacat lampahipun, tiyang ingkang adil dan bener, tiyang ingkang mboten nyebar pitenah, tiyang ingkang mboten tumindak piala dhateng rencangipun, Tiyang ingkang mboten memada sesaminipun, tiyang ingkang ngajeni lan ajrih asih dhumateng Gusti, sarta tiyang ingkang mboten nganakaken arta sarta mboten nampi besel (Ay. 2-5). Sedaya tiyang ingkang nglampahi gesang kados punika, tansah kaparingan papan wonten kratoning Allah.
Salebeting gesang kita ing alam donya punika, Gusti Allah ngersakaken pangucap kita punika, pangucap ingkang nuwuhaken katentreman, kabingahan, sarta berkah. Sampun ngantos pangucap kita punika namung pitenah, apus-apus sarta nyilakani tiyang sanes. Ing wulan Kitab Suci punika, kita kagungan tugas kangge ngucapaken punapa ingkang dados pangandikanipun Gusti ingkang kaserat ing Kitab Suci. Mangga kita wartosaken Injiling Gusti minangka kabar kabingahan dhateng sesami kita, supados sok sintena tiyang ingkang mirengaken pangucap kita, sami nampi berkah dan kabingahan ing gesangipun. Mangga kita sami atur pangucap ingkang nentremaken manah, ingkang ndadosaken tiyang sanes ngraosaken sih rahmat saking Gusti. Gusti Allah tansah paring kasagedan lan kawicaksanan dhateng kita kangge ngucapaken berkah ingkang nentremaken manah. Amin. [AR].
“Pangucap ingkang nentremaken manah, inggih punika pangucap sabdanipun Gusti.”
