Waosan: Galati 3 : 23 – 29 | Pamuji: KPJ. 352
Nats: “Ing bab iki ora ana wong Yahudi utawa wong Yunani, ora ana batur tukon utawa wong mardika, ora ana lanang utawa wadon, awit kowe kabeh padha dadi siji ana ing Sang Kristus Yesus.” (Ayat 28)
Sapunika wonten istilah circle (kelompok pertemanan). Circle karana hobby ingkang sami, karana aktivitas ingkang sami, karana karemenan ingkang sami. Tiyang ingkang sami makempal punika asring kasebat para tiyang ingkang sak-frekuensi. Sami-sami remen olah raga, sami-sami remen kuliner, sami-sami remen diskusi, lsp. Tamtu nggadhahi komunitas ingkang sami punika dados karemenan saha kabingahan tumrap gesang kita.
Sabdanipun Gusti dinten punika ngengetaken kita menawi saderengipun Sang Kristus rawuh, umatipun Gusti Allah kaemong dening angger-anggering Toret. Toret kaagem kangge mirsani iman saha kasetyanipun umat dhumateng Gusti. Ing Toret pancen wonten prekawis-prekawis ingkang ngetingalaken circle-ipun para umatipun Gusti, salah satunggalipun bab prajanjian sunat. Sunat dados tandha bilih priyantun punika sampun kaiket prajanji kasetyan kaliyan Gusti Allah. Ananging asring tandha sunat punika dados prekawis ingkang ndadosaken umatipun Gusti ngremehaken sesaminipun. Piyambakipun rumaos langkung dipun tresnani Gusti Allah, langkung unggul tinimbang tiyang ingkang mboten sunat, rumaos bilih bangsa ingkang pikantuk kawilujengan saking Gusti namung golongan Bangsa Israel, tiyang Yahudi kemawon. Mila lBangsa Israel utawi Tiyang Yahudi rumaos dados circle ingkang istimewa wonten ing ngarsanipun Gusti. Ananging sasampunipun Sang Kristus rawuh, mboten wonten malih bentenipun antawis tiyang Yahudi, tiyang Yunani, tiyang mardika utawi batur tukon, tiyang jaler, tiyang estri, sadaya dados satunggal, awit karana sih kamirahanipun Sang Kristus.
Kita angsal kemawon kagungan circle ingkang rena-rena, nanging kita kedah enget bilih kita ugi kalebet circle ing Gusti Yesus, inggih punika komunitas ingkang dipun tresnani saha nresnani Gusti Yesus. Punapa ingkang dados cirinipun? Cirinipun ingkang utami inggih punika gesang ing katresnan, mboten mbenten-mbentenaken sesami, mboten gumunggung. Punapa circle kita ing Gusti Yesus punika sampun estu ngetingalaken ciri ingkang utami punika? Mugi kita tansah nindakaken karsanipun Gusti salebeting gesang kita sadinten-dinten srana nresnani sesami kita tanpa mandeng rupa. Amin. [PKS].
“Circle ing Sang Kristus kedah nyehataken saha ngiyataken iman.”
