Waosan: Jabur 78 : 23 – 29 | Pamuji: KPJ. 334
Nats: “Gusti Allah tumuli dhawuh marang mega-mega ing dhuwur, lan mbikak lawang-lawanging langit.” (Ayat 23)
Tamtunipun kita nate ngraosaken kuwatos ing sadengah gesang kita, sae punika bab ekonomi, kesehatan, masa depan, lan sanesipun. Raos kuwatos punika raos ingkang limrah kanggenipun manungsa gesang. Ananging raos kuwatos punika kedah dipun tata kanthi sae supados mboten ndadosaken kita ajrih kangge nindakaken pakaryan utawi rancangan kita.
Waosan kita ngemutaken sejarah panganthinipun Gusti Allah dhateng Bangsa Israel nalika medal saking Mesir tumuju dhateng Kanaan. Kanthi cetha kaserat bilih Gusti Allah nyekapi kabetahanipun umat Israel, mliginipun bab tetedhan (Ay. 24). Saged kita bayangaken, nalika Bangsa Israel medal saking Mesir, mestinipun taksih kathah umat ingkang ngraosaken kuwatos bab gesangipun. Kados pundi mangke nedhanipun? Kados pundi mangke gesangipun? Lsp. Punika bab ingkang limrah, awit nalika taksih wonten Mesir tamtunipun umat Israel sampun nyambut damel lan kagungan sumber pangasilan ingkang ajeg kangge nyekapi gesangipun. Ananging karana umat Israel medal saking Mesir, tamtunipun panyambut damelipun sadinten-dinten kedah dipun tilar lan sumber pangasilanipun ical. Sanyata, Gusti Allah klayan katresnanipun tansah ngrimati umat Israel. Umat Israel kaparingan tetedhan ingkang wujud roti Manna lan daging peksi, ingkang cacahipun kathah sanget, cekap kangge tedhanipun umat Israel. Tamtunipun sedaya punika karana pakaryanipun Gusti Allah lan umat Israel purun manut nindakaken karsanipun Gusti, lumampah medal saking Mesir.
Saking Pangandikanipun Gusti wekdal punika, kita saged sinau nalika kita purun nindhakaken karsanipun Gusti Allah, kita pitados bilih Gusti Allah tansah maringi lan nyekapi kabetahan gesang kita. Ingkang dados tembung kuncinipun, inggih punika purun nindhakaken karsanipun Gusti. Pramila swawi kita nliti priksa kawontenan gesang kita piyambak-piyambak, ngantos dumugi samangke punapa kita sampun nindakaken karsanipun Gusti? Punapa kita taksih ngukuhi pikajeng kita piyambak ing gesang punika? Mangga kita tansah ngutamikaken lan nindakaken karsanipun Gusti Allah wonten salebeting gesang kita, awit Gusti Allah piyambak ingkang mbikak korining langit lan ngluberaken berkah kangge kita. Mugi Gusti ngiyataken kita. Amin. [PY].
“Sampun kuwatos, Gusti kang mranata.”
