Waosan: Wilangan 22 : 1 – 21 | Pamuji: KPJ. 428 : 1
Nats: “Nanging Bileam mangsuli marang para utusane Sang Prabu Balak: “Sanadyan Sang Prabu Balak maringna salaka lan mas sakadhatonipun kebak, ewadene kula mboten saged nindakaken punapa-punapa, ingkang sapele punapa ingkang wigatos, ingkang nerak dhawuh timbalanipun Pangeran Yehuwah Gusti Allah kula.” (Ayat 18)
Kita sedaya sejatosipun nggadhahi rancangan gesang ingkang perlu dipun perjuangaken temahan saged kawujud ing gesang. Rancangan punika asring kita pasrahaken wonten ing ngarsanipun Gusti lumantar pandonga. Nanging kasunyatanipun asring rancangan kita punika mboten kawujud ing gesang kita, malah prastawa lintu ingkang kita tampi. Secara kamanungsan asring kita kuciwa lan protes, “Punapaa rancangan ingkang kita tata kanthi sae mboten kelampahan ing gesang kita?” Punika limrah awit kita saged mranata utawi ngrancang nanging Gusti Allah ingkang namtokaken.
Prastawa bab rancangan ugi kaserat ing waosan kita dinten punika. Kacariyosaken bangsa Israel ingkang sampun kondhang ngadepi tiyang Amori ndadosaken tiyang Moab kataman giris. Lajeng Prabunipun ngutus utusan tindak dhateng Bileam saperlu nyuwun pitedah supados bangsa Israel saged dipun kawonaken. Nanging nalika Bileam nyuwun pitedah ing ngarsanipun Gusti Allah, Gusti Allah paring pangandika bilih bangsa Israel punika bangsa ingkang sampun dipun berkahi dening Panjenenganipun. Pramila Bileam kadhawuhan mboten perlu ngetut para utusan punika sowan ing Moab. Sanadyan Bileam nggadah kakiyatan ananging Bileam mboten saged ngrubah tatanan pakaryanipun Gusti Allah (Ay. 18). Punika nedahaken bilih Bileam ngrumaosi mboten saged ngungkuli kakiyatanipun Gusti Allah ingkang mrananta sedayanipun.
Dene kita sami mranata lan nggadhahi rancangan gesang, punika sarana kangge kita nggadhahi pangajeng-ajeng ingkang sae kangge gesang kita. Kita ngupadi supados rancangan punika saged kalampahan salebeting gesang kita. Mila dene kita sampun kanthi saestu ngupadi nanging pakaryan ingkang kababar ing gesang kita mboten kados rancangan kita, mangga kita sami pitados bilih wonten pakaryanipun Gusti ingkang adi ingkang kelampahan ing gesang kita. Kita saged ngrancang nanging Gusti Allah ingkang makarya sedaya ing alam donya punika. Punapa ingkang saged kita tindakaken mangga kita tindakaken kanthi saestu, lajeng sasampunipun kita pasrahaken ing Astanipun Gusti. Amin. [gfc].
“Nindakaken rancangan kanthi saestu nanging sedayanipun Gusti ingkang makarya.”
