Waosan: Yakobus 1 : 1 – 8 | Pamuji: KPJ. 124
Nats: “Dene manawa panunggalanmu ana kang kekurangan kawicaksanan, iku nyuwuna marang Gusti Allah, kang maringi marang sakabehing wong kanthi eklas, ora kanthi ngundhat-undhat, sarta bab iku bakal kaparingake marang dheweke.” (Ayat 5)
Gesang ing donya punika, saged dipun gambaraken kados dene tiyang ingkang dipun utus kesah tebih, tumuju papan ingkang dereng nate dipun mangertosi. Nalika ing margi, kita manggihi persimpangan margi ingkang kathah. Bilih salah pilih margi, kita saged kesasar lan mboten dumugi tujuan. Mekaten ugi, wonten maneka warni pilihan jalur alternatif, ingkang kedhah kita pilih. Wonten jalur ingkang tebih nanging lancar; ugi wonten jalur alternatif ingkang langkung celak nanging marginipun rusak. Ing kahanan kados mekaten, kita sejatosipun mbetahaken peta utawi rencang damel ingkang sumerep saestu margi ingkang kedhah dipun langkungi.
Waosan kita saking serat Yakobus paring pitedah, bilih panyoba punika sejatosipun sanes saking Gusti Allah. Nanging panyoba punika sumberipun saking pepinginanipun manungsa piyambak, ingkang asring nerak lan nebih saking angger-anggeripun Gusti. Minangka abdinipun Gusti, kita dipun suwun supados saged tatag lan tanggon, ngadepi sedaya pepinginan daging lan godanipun dosa. Kita kedah merjuang njagi lampah gesang kita, supados namung miturut ing marginipun Gusti. Matemah saking perjuangan kita punika, iman kita sansaya kiyat lan sabar. Kita sansaya sampurna nindakaken karsanipun Gusti, sarta mboten kekirangan punapa-punapa (Ay. 3-4). Nanging ing salebeting perjuangan kita punika, kita kedhah nyuwun kawicaksanan dhumateng Gusti (Ay. 5). Kita kedah gumantung lan nyuwun panuntunipun Gusti, supados Gusti piyambak ingkang nuntun lampah kita. Sampun ngantos kita gumunggung lan mlampah miturut pikajeng kita piyambak, ingkang saged ndadosaken kita kesasar lan mboten dumugi tujuan.
Mangga ing wanci samangke, kita sesarengan sami masrahaken gesang kita ing ngarsanipun Gusti. Mangga kita sami sadar, bilih kita punika manungsa ingkang winates lan asring salah pilih margi. Ingkang kita betahaken inggih punika tuntunan lan kawicaksanan saking Gusti, matemah margi ingkang kita pilih punika, inggih margi ingkang leres. Bilih kita saged kanthi setya merjuang ngadepi sedaya pepinginan daging lan gumantung dhumateng Gusti, wonten makuthaning panguripan ingkang badhe kita tampi. Amin. [YAH].
“Kula pitados dhumateng Gusti, sumber pitulungan ingkang sejati.”
