Waosan: Yeheskiel 30 : 20 – 26 | Pamuji: KPJ. 369 : 1 – 4
Nats: “Ingsun bakal mbuyarake wong Mesir ana ing antarane para bangsa lan nyebar wong-wong mau menyang ing sakehe nagara. Ing kono banjur bakal padha sumurup manawa Ingsun iki Yehuwah.” (Ayat 26)
Menawi panjenengan enget bab kapal Titanic taun 1912, ingkang ndamel kapal punika nate matur kanthi gumunggung, bilih Gusti kemawon mboten saged ngeremaken kapal punika. Nanging nyatanipun kapal punika kerem awit nabrak redi es. Punika negesaken bilih gumunggung saged ngremukaken kita lan pigesangan kita. Awit kathah tiyang ingkang mboten remen dhateng tiyang gumunggung, punapa malih Gusti Allah.
Yeheskiel 30 paring paseksi bangsa Mesir ingkang gumunggung, awit ngrumaosi kathah bangsa kiyat ingkang purun mbiyantu, nggadhah bengawan Nil, sugih, lan nggadhah dewa-dewa ingkang saged dipun andelaken dados pangayoman. Sadaya punika ingkang ndadosaken bangsa Mesir gumunggung. Kasugihan lan kasuksesan ingkang dipun alami ndadosaken bangsa Mesir mboten saged ningali kanthi cetha, bilih Gusti Allah ingkang sampun maringaken sadayanipun wau. Kawontenan punika ingkang ndadosaken Gusti Allah duka lan ngukum bangsa Mesir. Gusti Allah badhe nyirnakaken panguwaosipun bangsa Mesir lumantar bangsa Babil, supados bangsa Mesir saged ningali kanthi cetha bilih Gusti Allah ingkang maringi sadayanipun punika. Ing ayat 26 kasebataken: “Ingsun bakal mbuyarake wong Mesir ana ing antarane para bangsa lan nyebar wong-wong mau menyang ing sakehe nagara. Ing kono banjur bakal padha sumurup manawa Ingsun iki Yehuwah.”
Kados dene bangsa Mesir, langkung fokus dhumateng kasuksesan, bandha kadonyan, lan sesambetan kaliyan sesami asring ndadosaken pepalang tumrap kita ningali kuwaos lan pangayomanipun Gusti Allah ing pigesangan kita. Punika saged ndadosaken kita kesupen kaliyan Gusti lan namung ngandelaken kakiyatan kita piyambak, matemah ndadosaken kita rumaos hebat. Swawi kita sinau saking waosan kita. Bilih samangke kita ngalami gesang sukses ing pandamelan, sugih, kagungan kalenggahan, panguwaos, sesambetan kaliyan sesami ingkang raket, ngatos-atos awit sadaya punika saged ndadosaken kita kesupen kaliyan Gusti ingkang maringi sadaya punika. Ing ngriki kita sampun dados tiyang gumunggung awit gumunggung saged dadosaken kita ambruk. Pramila kita kedah ngati-ati, sampun ngantos kita gumunggung. Amin. [nn].
”Gumunggung iku pucuking ambruk.” (Wulang Bebasan 16:18b)
