Waosan: Efesus 6 : 21 – 24 | Pamuji: KPJ. 186
Nats: “Sih-rahmat anaa ing wong kabeh, kang padha nresnani Gusti kita Yesus Kristus kanthi katresnan kang ora sirna ing salawas-lawase.” (Ayat 24)
Sak limrahipun saben tiyang nggadhahi pepinginan, tiyang sanesipun nggatosaken piyambakipun. Ananging asring pepinginan dipun gatosaken kaliyan tiyang sanes punika mboten saged kelampahan. Mekaten ugi, asring kita mboten purun nggatosaken kawontenan gesangipun tiyang sanes. Tamtu kawontenan punika ingkang asring dipun sebat egois. Ananging punapa kita minangka umat kagunganipun Gusti taksih nglampahi gesang kanthi raos egois punika? Mboten peduli dhumateng tiyang sanesipun? Swawi kita sami niti priksa gesang kita kanthi ningali gesangipun Rasul Paulus lan Pasamuwan Efesus.
Waosan kita nedahaken nalika pasamuan Efesus mireng pawartos bilih Rasul Paulus kinunjara. Saperangan umat ing Efesus rumaos semplah awit saking kahanan ingkang dipun alami dening Rasul Paulus. Mila, para umat ing Efesus sami pados pawartos bab kahananipun Rasul Paulus. Wangsulan Rasul Paulus tumraping raos kangen lan peduli para umat Efesus, inggih punika ngutus Tikhukus kangge martosaken kahananipun ugi mbekta layang ingkang kaserat Rasul Paulus piyambak. Ing wekdal punika, Rasul Paulus ugi ngiyataken manahipun Tikhikus minangka rencang peladosan ingkang setya tuhu nderek Gusti Yesus. Sanadyan Tikhikus sampun rawuh wonten satengahing pasamuwan Efesus, taksih wonten raos sumelang lan kasedihan. Kadosdene pasamuwan Efesus ingkang mujudaken kawigatosanipun, Rasul Paulus ugi nanggepi awit saking kawigatosan punika. Lumantar salam sih rahmat lan tentrem rahayu saking Allah Sang Rama lan Gusti Yesus ingkang tansah ngamping-ampingi lelampahan wontening gesang pasamuwan Efesus. Piwucalipun Rasul Paulus dhateng umat ing Efesus supados para umat tansah mbangun turut gesang cunduk kaliyan punapa ingkang dipun dawuhaken Gusti Allah.
Swawi kita nuladha saperangan gesang umat ing Efesus lan Rasul Paulus ingkang tansah peduli satunggal dhateng satunggalipun. Kita saged mujudaken raos peduli kita punika kanthi ndongakaken lan paring pambiyantu dhateng sedherek kita nalika kita nyumurupi sedherek kita punika kacingkrangan lan mbetahaken pitulungan. Mangga ing wulan pambangunan punika, kita mbangun raos peduli dhateng sesami, greja, lan lingkungan kita. Kita wujudaken kapedulian kita punika sarana kasedyan kita mbantu tiyang sanes ingkang mbetahaken pitulungan kita. Amin. [Nandes].
“Urip iku urup.”
