Waosan: Yeremia 1 : 4 – 10 | Pamuji: KPJ. 202 : 1 – 3
Nats: “Aja sira wedi marang wong-wong iku, amarga Ingsun nganthi sira supaya ngluwari sira, mangkono dhawuh pangandikane Sang Yehuwah.” (Ayat 8)
Medhar sabdanipun Gusti ingkang kaserat ing Kitab Suci punika pancen mboten gampil. Saben tiyang kedah nyinaoni Kitab Suci punika kanthi tumemen supados saged mangertos punapa ingkang dipun dawuhaken Gusti. Kejawi punika, ugi kedah nggadhahi mental ingkang kiyat, satemah Pangandikanipun Gusti ingkang kawedaraken punika saged dipun tampi dening saben tiyang ingkang mirengaken. Nadyan mekaten mboten saben tiyang ingkang kapiji dening Gusti, enggal purun medhar sabdanipun Gusti. Malah ugi wonten ingkang kanthi blaka matur: “Kula mboten sagah”, “kula mboten siap” lajeng nglairaken mawerni-werni alasan. Satunggiling prekawis ingkang asring dados alasan, inggih punika karana ajrih.
Nalika Yeremia dipun kersakaken Gusti Allah nindakaken timbalan minangka Nabi. Yeremia rumaos ajrih nindakaken ayahan timbalan punika. Yeremia rumaos mboten saged wicanten, awit taksih nem (Ay. 6). Yeremia mbayangaken, bilih nindakaken ayahan minangka Nabi punika awrat sanget. Nalika semanten, Nabi punika sebatan kagem satunggiling tiyang ingkang dipun kersakaken dening Gusti medhar sabdan-Ipun dhateng manungsa. Para Nabi punika mboten namung ngengetaken, nanging ugi asring sanget nglawan ratu utawi bangsa Israel ingkang lakunipun nyimpang saking karsanipun Gusti. Nadyan mekaten, punapa ingkang dados karsanipun Gusti kedah kalampahan. Pramila, Gusti nyantosakaken manahipun Yeremia supados mboten ajrih nindakaken ayahan minangka nabi. Gusti tansah nganthi Yeremia minangka abdi-Nipun supados saged nindakaken ayahan peparing-Ipun.
Ngantos samangke Gusti ugi ngersakaken ing antawisipun para umat kagunganipun supados sumadya nindakaken karsanipun, inggih punika medhar sabdanipun Gusti. Medhar sabdanipun Gusti punika mboten namung awujud khotbah, nanging ugi saged awujud ngengetaken lan paring pitedah dhateng saben tiyang ingkang tumindakipun mboten nyondhongi kaliyan karsanipun Gusti. Pancen ayahan punika mboten gampil lan awrat. Nanging, menawi Gusti piyambak ingkang ngersakaken kita nindakaken ayahan punika sampun ngantos kita ajrih. Menawi ingkang kita lampahi nyondhongi kaliyan karsanipun Gusti, Panjenenganipun mesthi paring kasagedan dhateng kita. Gusti tansah nganthi kita. Amin. [HSW].
“Gusti tansah nganthi saben tiyang ingkang dipun paringi ayahan medhar Sabdanipun.”
