Waosan: Dhaniel 7 : 19 – 27 | Pamuji: KPJ. 363 : 1 – 3
Nats: “Sawuse mangkono paprentahan, pangwasa lan kamulyaning karajan-karajan ing sangisore saindenging langit bakal kaparingake marang para wong suci, …” (Ayat 27)
Kita tamtu mangertos bilih saben tiyang ingkang nyambut damel mesthi ngajeng-ajeng lan kepengin opah ingkang cocok kaliyan tenaga, pikiran, lan keahlian ingkang dipun gadhahi ing panyambut damelipun. Prekawis punika ingkang dados dhasar kenging punapa opahipun satunggal tiyang kaliyan tiyang sanesipun benten-benten. Sadaya sampun kaukur lan kapiji sinten-sinten kemawon, punapa kemawon kesagedanipun lan pinten opahipun ingkang cocok. Ananging bilih kita nyambut damel, wonten ing panyambut damel punapa kemawon, ingkang dados tujuan utami kita namung opahipun kemawon tanpa mentingaken kwalitas panyambut damel kita, tamtu juragan pundi kemawon badhe sengit dhateng kita. Namung tiyang enthengan lan mentingaken kwalitas panyambut damel ingkang badhe nampi ganjaran ingkang sembada saking juragan kang bener lan temen.
Ing waosan kita, Dhaniel paring tetingalan bab ingkang badhe kalampahan ing satengah-tengahing bangsa Israel. Awit sakiwa tengen lan kawontenan wekdal ingkang dipun lampahi Bangsa Israel punika kawontenan perang ing satengahing para bangsa, gegambaran ganjaran ingkang ngebaki penggalihipun inggih bab kaunggulan ing peperangan. Tegesipun bangsa Israel pitados bilih tiyang ingkang nglampahi gesang suci wonten ing ngarsanipun Sang Yehuwah badhe nampeni ganjaran-ganjaran ingkang arupi barang jarahan lan nelukaken bangsa sanesipun.
Ananging wosipun panyinaon kita, sanes bab ganjaran kadosdene gegambaranipun bangsa Israel ing wekdal semanten, ingkang mboten tebih-tebih saking prekawis kadonyan. Ganjaran ingkang kedah kita ugemi nggih punika: ganjaran ingkang dipun paringaken Gusti nalika kita sampun sesarengan gesang kaliyan Penjenenganipun wonten ing kraton swarga. Tiyang ingkang tansah nglampahi gesang suci, mesthi badhe nampeni ganjaran ingkang samesthinipun saking Gusti, inggih punika gesang langgeng. Mangga kita tansah ngupaya gesang ingkang nuwuhaken kasaenan lan kaluhuranipun Gusti. Amin. [YEP].
“Penting lakoni kanthi temen dhisik, rejeki wes ana sing ngatur.”
