Waosan: Kolose 1 : 9 – 14 | Pamuji: KPJ. 326 : 1 – 4
Nats: “Marga saka iku, wiwit aku oleh pawarta mau, ora pegat anggonku ndongakake kowe. Kang daksuwun supaya kowe kaparingana sakabehing kawicaksanan lan kawruh kasukman kanggo nyumurupi bab karsane Pangeran kang kalawan sampurna.” (Ayat 9)
Kathah tiyang ingkang rumaos mengertos gegayutan kaliyan prekawis-prekawis ingkang sae lan kedah dipun lampahi ing pigesangan punika. Nanging emanipun mboten sedaya tiyang saged ngecakaken prekawis-prekawis ingkang sae punika wonten ing gesangipun sadinten-dinten. Wonten ing gesang bebrayatan, ing antawisipun para warganing brayat sami mengertos bilih gesang ingkang sumanak, kebak ing sih katresnan, lan apura-ingapura kedah kawujudaken (Ef. 4:32). Sanadyan mekaten tumindak kados mekaten punika mboten gampil dipun lampahi. Nyatanipun, wonten kemawon tukar padu lan cecongkrahan ing antawisipun warganing brayat. Migatosaken kawontenan ingkang kados mekaten punika, para warganing brayat merlokaken kawicaksanan lan kawruh kasukman supados saged nyumurupi punapa ingkang dados karsanipun Gusti Allah.
Nyumurupi punapa ingkang dados karsanipun Gusti Allah punika mboten gampil. Menawi wonten ingkang rumaos nyumurupi, nyatanipun ugi rumaos kewetan ngecakaken wonten ing gesangipun sadinten-dinten. Prekawis ingkang kados mekaten punika dipun rumaosi dening Rasul Paulus. Pramila, Rasul Paulus ndongakaken para umat kagunganipun Gusti Allah ing Kolose supados saged mujudaken tumindak ingkang dados karsanipun Gusti Allah. Ing pandonganipun Rasul Paulus nyenyuwun supados warga pasamuwan ing Kolose kaparingan “…kawicaksanan lan kawruh kasukman kanggo nyumurupi bab karsane Pangeran kang kalawan sampurna.” (Ay. 9).
Tumrap para umat kagunganipun Gusti, nggadhahi kawicaksanan lan kawruh kasukman punika pancen saestu dipun betahaken. Mekaten ugi brayat ingkang katunggilaken dening Gusti. Saben brayat kedah ngupadi nyumurupi punapa ingkang dados karsanipun Gusti, sarta ngecakaken wonten ing gesang bebrayatan. Ing ngriki kita nampi tuladha saking Rasul Paulus inggih punika supados ing gesang bebrayatan, warganing brayat tansah donga dinonga. Mangga kita nyenyuwun dhumateng Gusti supados kaparingan kawicaksanan lan kawruh kasukman supados kita mangertos lan saged nindakaken karsanipun Gusti. Satemah brayat kita tansah karenan ing ngarsanipun Gusti Allah. Amin. [HSW].
“Pandonga saged dados sarana tumrap saben tiyang nyumurupi karsanipun Allah, sarta nampi kasantosan ngecakaken karsanipun Allah ing gesang bebrayatan.”
