Waosan: Yokanan 6 : 56 – 69 | Pamuji: KPJ. 124
Nats: “Atur wangsulane Simon Petrus: “Gusti ingkang kula purugi sinten? Pangandika Paduka punika pangandikaning gesang langgeng.” (Ayat 68)
Ing pigesangan punika saben tiyang tansah ngadhepi pilihan. Tumrap pilihan punika saben tiyang kedah nemtokaken pundi ingkang dipun pilih! Gegayutan kaliyan kapitadosan dhumateng Gusti Yesus ugi wonten pilihan, inggih punika: “Tansah ndherek Gusti Yesus utawi nilar Gusti Yesus?” Nadyan ndherek Gusti Yesus punika bingahaken nanging para pandherekipun Gusti Yesus ugi kedah siyap ngadhepi mawerni pakewet. Pramila, saben tiyang kedah nimbang-nimbang langkung rumiyin kanthi temen gegayutan kaliyan pilihan ingkang dipun temtokaken. Inggih mekaten ingkang kawucalaken dening Gusti Yesus.
Saben tiyang ingkang pitados dhumateng Gusti Yesus lan dados pandherek-Ipun punika pancen saged ngraosaken kabingahan lan katentreman, awit nampi gesang langgeng peparingipun Gusti Allah. Nadyan mekaten saben tiyang ingkang pitados dan dados pandherekipun Gusti Yesus ugi mboten kalis saking mawerni-werni pakewet. Malah ugi wonten ingkang lajeng nilar Gusti Yesus, awit mboten kiyat ngadhepi pakewet ing gesangipun. Kamangka Gusti Yesus ugi sampun paring piwucal lan ngengetaken saben tiyang gegayutan kaliyan konsekuensi ingkang dipun alami. Gusti Yesus malah sampun paring tuladha gegayutan kaliyan kasangsaran ingkang dipun alami, krana nindakken karsanipun Gusti Allah, Ramanipun. Pramila, dhumateng saben tiyang ingkang sampun nampi piwucal lan tuladha saking Gusti Yesus dipun tanting dening Gusti Yesus supados wantun nemtokaken pilihanipun. Gusti Yesus saged ndangu kita minangka para pandherek-Ipun kados dene ndangu para sakabat-Ipun: “Apa kowe ora padha arep lunga?” (Ay. 67). Tegesipun punapa kita badhe nilar Gusti Yesus awit rumaos mboten sagah ngadhepi pakewet lan kasangsaran ingkang dipun alami?
Sumangga kita nanggapi pandangunipun Gusti Yesus kanthi cetha lan teges supados nampi gesang langeng. Tansah mantep ndherek Gusti Yesus kados dene Petrus ingkang paring wangsulan: “Gusti ingkang kula purugi sinten? Pangandika Paduka punika pangandikaning gesang langgeng.” (Ay. 68). Gusti Yesus tansah nyantosakaken kapitadosan kita. Amin. [HSW].
“Mugi Gusti Yesus ngiyatkaken kapitadosan kawula supados tansah mantep dados pandherek-Ipun.”
