Waosan: 2 Para Raja 12 : 1 – 16 | Pamuji: KPJ. 175
Nats: “Sang Prabu Yoas iku nglampahi apa kang bener ana ing paningaling Pangeran Yehuwah, ing salawase sugenge, sajrone kawulang dening Imam Yoyadha.” (Ayat 2)
Salah satunggaling bagian ingkang dipun betahaken tukang bangunan supados bangunan punika saged kiyat, inggih punika pondasi. Saged dipun bayangaken nalika bangunan punika mboten wonten pondasinipun, tamtu bangunan punika ringkih. Nalika kenging jawah ingkang deres, panas dalah angin, bangunan punika badhe risak lan rubuh. Mekaten kangge kita para tiyang pitados, iman dhumateng Gusti Yesus punika pondasining gesang kita. Kasetyan kita dhumateng Gusti Yesus punika ingkang dadosaken Padaleman Suci ing gesang kita kiyat.
Prabu Yoas dipun akeni minangka Raja Yehuda ingkang gesangipun leres lan bener wonten ing ngarsaning Gusti Allah. Nalika mimpin Yehuda, piyambakipun nggadhah nadar kangge ndandosi Padaleman Suci ingkang risak. Saking tekading Prabu Yoas kangge mbangun Padaleman Suci punika, kita mangertos: Sepindah, Prabu Yoas saestu wigati anggenipun ndandosi Padaleman Suci. Prabu Yoas kepengin umat Yehuda tansah setya lan manembah dhumateng Gusti Allah kemawon. Mila piyambakipun ngupaya pambangunan Padaleman Suci ingkang risak punika saged rampung. Kaping kalih, Prabu Yoas mbuktikaken nadaripun kanthi ngempalaken artha saking umat kangge ndandosi Padaleman Suci. Artha punika dipun damel nyekapi upahipun tukang, ugi material ingkang dipun betahaken kangge mbangun Padaleman Suci punika. Mekaten kangge gesang kita, kita dipun utus kangge mbangun gesang kita minangka Padaleman Suci srana sikep, tumidak, pangucap ingkang mbangun turut karsanipun Gusti. Kita ugi purun atur pisungsung kagem Gusti lumantar grejanipun. Kita ngaturaken pisungsung ingkang endah. Mboten namung awujud artha lan bandha kemawon ananging ugi awujud paladosan lan katresnan kita dhateng Gusti lan sesami.
Wulan kitab suci punika, wekdal ingkang prayogi kangge kita niti priksa gesang karohanen kita. Sabdanipun Gusti ingkang sinerat ing Kitab Suci punika dados margi kita tumuju kayekten. Kados Prabu Yoas ingkang dipun timbali Gusti kangge mbangun Padaleman Suci, kita dipun timbali Gusti kangge martosaken Injil Suci, sarta nglajengaken sih katresnanipun Sang Kristus dhateng sesami. Sumangga ing wulan Kitab Suci punika, kita tetekad kangge maos lan nindakaken Sabdanipun Gusti. Kita landesai gesang kita srana mbangun miturut sabdan-Ipun Gusti ing Kitab Suci minangka margining kayekten. Amin. [asen].
“Kitab Suci dados alat supados kita mboten nerak angger-anggeripun Allah.”
