Waosan: Markus 6 : 30 – 34; 53 – 56 | Pamuji: KPJ. 124
Nats: “Nanging nalika padha mangkat, akeh wong kang padha weruh lan nyumurupi sedyane. Ora suwe banjur akeh wong kang padha teka saka ing kutha-kutha kabeh, kang padha lumaku dharat menyang ing panggonan kono, ndhisiki tekane.” (Ayat 33)
Tamtu kita sami wanuh kaliyan pepujian rohani Jawi ingkang kasuwur, nggih punika “Nggadhol Gusti”. Pepujian punika nedahaken bilih ‘nggandhol Gusti’ ing sauruting lampah gesang punika badhe nuwuhaken raos ayem lan bungah, awit pangayomaning Gusti ingkang saestu dipun ugemi ing salebeting iman kapitadosan.
Waosan Markus 6:30-34 ugi nyariosaken nalika Gusti lan para sekabat tindak papan ingkang sepi saperlu ngaso awit kahanan badan ingkang sayah. Kacariosaken bilih dhahar kemawon mboten saged, ananging nalika para tiyang kathah sami pirsa lan nyumurupi tindakipun Gusti Yesus, para tiyang kalawau sami nempuh laku dharat mapag rawuhipun Gusti. Mirsani ingkang kahanan makaten kalawau, Gusti Yesus trenyuh margi saking welasipun. Gusti Yesus ngayomi para tiyang kalawau! Salajengipun, wonten ing ayat 53-56, nalika Gusti dumugi ing tanah Genesaret, para tiyang mboten pangling lan martosaken bab rawuhipun Gusti. Babagan punika ndadosaken para tiyang saking sakiwa tengene Genesaret sami rawuh manggihi rawuhipun Gusti Yesus. Para tiyang kalawau nggadhah pamanggih bilih sedaya karingkihan badan badhe kaluwaran lumantar pakaryaning Gusti Yesus.
Menawi dipun pirsani, para tiyang kalawau pitados bilih piyambakipun ngalami pepanggihan kaliyan Gusti Yesus, sedaya momotan gesang ingkang dipun sandhang badhe luwar. Pramila para tiyang kalawau kanthi temen ing pundi papan dunungipun lan kadosa pundi kahananipun tansah ngupadi supados ngalami pepanggihan kaliyan Gusti Yesus! Bab punika ingkang dadosaken pitakenan, “Punapa raos temen anggenipun ngetut Gusti kados dene para tiyang ingkang karaya-raya kalawau taksih wonten ing gesang kita wekdal punika?” Sumangga kita kagungan semangat lan tekad ingkang teman anggenipun ndherek Gusti Yesus. Ndherek Gusti Yesus mboten namung amargi kita kepenging nampi berkah saking Gusti kemawon, nanging saestu amargi kita tresna dhumateng Gusti Yesus. Amin. [ven]
“Urip iku terus mlaku, bebarengan karo wektu, sing bisa gawa lakumu, supaya apik kahananmu.”
