Waosan : Jabur (Mazmur) 9 : 1 – 14 | Pamuji : KPK 28 : 1, 2, 3
Nats: “Kawula badhe bingah-bingah sarta asumyak-sumyak awit saking Paduka, Asma Paduka kawula puji klayan masmur, dhuh Gusti kang Mahaluhur” [ayat]
Sapunika kathah nem-neman greja ingkang remen memuji asmanipun Gusti kanthi pujian pop rohani. Punapa punika klintu? Tamtu boten. Nanging wonten pitakenan ageng ingkang kedah kita wangsuli: kenging punapa ing antawis kita remen memuji ngange pujian pop rohani tinimbang pujian ingkang wonten greja kita? Umumipun kita punika ngraosaken lagu pop rohani langkung gampil dipunsinaoni, musik lan arragementipun eca, lan lagu punika ugi mresep ing manah. Kados pundi kaliyan pujian kita? Punapa boten gampil dipunsinaoni, boten dipunarragement kanthi sae, lan punapa boten saged ndudut ati?
Lagu pujian tamtu boten angger dipun damel dening pengarangipun. Lagu dados wujuding refleksi pengarangipun karana ngrasoaken kaeraman tumrap kuwaosipun Gusti, pitulunganipun Gusti, lsp. Anggenipun milih nada lan tembung tamtu kanthi manah ingkang lebet.
Kitab Jabur menika minangka masmur pujian ingkang kalairaken dening Dawud, karana saestu ngraosaken pakaryanipun Allah ing gesangipun. Sedaya saestu ngemu teges lan pengaken ingkang tulus, malah karaos endah menawi anggenipun memuji ngginakaken raosing manah kangge kaluhuranipun Allah. Kumandhanging kala sangka, clempung, slukat, terbang, suling, kecer kang kemerincing, malah ugi kanthi jejogedan sansaya nyampurnakaken endahing pepujian punika konjuk ngarsanipun Gusti.
Memuji tamtu perkawis ingkang gampil tumrap kita tiyang Kristen. Pepujian Kristen saestu lebet sanget maknanipun tumrap gesang iman kapitadosan kita. Nanging kados pundi pepujian ingkang kita unjukaken boten namung ala kadarnya, nanging ugi saged ndudut ati nggigah manah? Mangga pepujian punika kita cawisaken saestu, arragement ingkang cocok, ketukan ingkang pas, kanthi langkung rumiyin mangertos punika ingkang dipunpikajengaken lagu punika. Supados pepujian ingkang kita pujekaken dados berkah kangge kita ingkang memuji lan kangge sedhengah tiyang ingkang mirengaken. [PKS]
“Asthma Paduka kawula puji klayan KJ, KPK, KPJ, Kidung Kontekstual, dhuh Gusti kang Mahaluhur.”
