Waosan: Lelakone Para Rasul 2:1-21 l Pamuji: KPJ. 283
Nats: “Anadene saben wong kang nyebut asmaning Pangeran iku bakal kapitulungan rahayu”(Ay. 21)
Dinten punika dinten ingkang wigati sae kangge tiyang Kristen ugi tiyang Indonesia. Kangge tiyang Kristen dinten punika kasebat dinten Pentekosta lan kangge tiyang Indonesia, dinten punika kasebat dinten Kebangkitan Nasional utawi HARKITNAS. Kalih prastawa ingkang ngengetaken bab Persatuan dan Kesatuan. Bangsa Indonesia saged bangkit, karana persatuan lan kesatuan bangsa. Mekaten ugi tiyang Kristen kaengetaken bab persatuan lan kesatuan ing Sang Kristus.
Tanggal 20 Mei dipun pengeti minangka dinten Kebangkitan Nasional. Tanggal punika mendhet saking dinten miyosipun organisasi Boedi Oetomo. Bung Karno netepaken HARKITNAS punika ing mangsa awal kamardikan (1948). Bung Karno mawas bilih ing wiwitaning kamardikan bangsa punika betahaken ‘Pemersatu’. Bung Karno mirsani bilih kelahiran Budi Oetomo dados simbol ingkang trep kangge nggambaraken persatuan lan kesatuan bangsa.
Tiyang Kristen ugi kaengetaken bilih kita ugi gadhai simbol pemersatu kaimanan kita inggih Sang Kristus. Sarana pitados lan nyebut asmaning Pangeran kita kapitulungan rahayu. Kacariyos ing dinten Pentekosta para tiyang saking tlatah pundi-pundi sami makempal ing Yerusalem. Para Rasul sami ngagem basanipun tiyang-tiyang kalawau. Bab lelampahan punika sampun kaweca lumantar Nabi Yoel bilih, “Ingsun bakal ngesokake Rohingsung marang sakabehing manungsa; anak-anakira lanang lan wadon padha mendhar wangsit, …” (Yoel 2:28).
Saking dhawuhipun Gusti kita saged nyinau:
- Bilih Pakaryanipun Gusti Allah Sang Rama, Yesus Kristus Sang Putra, tuwin Sang Roh Suci punika nyatunggil.
- Mekaten ugi kita tiyang Kristen saking pundi kemawon asal kita, kita nyawiji ing Sang Kristus. Pramila menawi GKJW nggadahi sesanti : Patunggilan Kang Nyawiji. Nyawiji dhateng sinten? Dhateng Sang Kristus.
- Pramila greja saged dados seksi lan leladi kanthi trep menawi greja boten cecongkrahan, nanging nyatunggil. Sabab srana nyatunggil kita saged mbabaraken kamardikan, sae kamardikan minangka tiyang Kristen ugi kamardikanipun nusa lan bangsa. (pong)
“Rukun agawe santosa, Crah agawe bubrah”
