Waosan : Lelakone Para Rasul 2 : 14-24 | Pamuji: KPJ No. 449
Nats: “Para sadherek Israel, kula aturi midhangetaken atur kula punika: Ingkang kula kajengaken inggih punika Gusti Yesus saking Nasaret (ayat 22)”
“Bapak iso masang gambar puzzle iki? “, pitakone anak wedok sing lagi menthelengi potongan gambar sing pating slengkrah ana neng meja sinaune. “ Menawa ora iso tak ajari! “ . “Iya, piye carane ?”, wangsulanku. “Iki…deleh kene, sing iku neng ndhuwur, kuwi neng pojok lst.”
Anak saged ngepasaken perangan kethokan gambar amargi saderengipun sampun ngertos gambar utuh. Benten kaliyan tiyang sepuhipun ingkang dereng ningali gambar utuh, radi kewetan anggenipun nata puzzle. Tiyang sepuh betahaken wekdal lan intuisi kangge mbayangaken gambaripun.
Manungsa sarwa winates anggenipun mangertosi rancangan lan pakaryanipun Allah. Lelampahan ing sakiwa-tengenipun boten saged ndunungaken pangandikanipun Gusti ingkang sampun kawedhar dening para nabi. Menawi wonten tiyang ingkang mastani kedadosan ing gesangipun awon, ateges “gagal paham” kaliyan pakaryan kawilujenganipun Allah ing Sang Kristus Yesus. Cekak aosipun: ora bisa ndunungke dhawuhe Gusti ingkang disinau, digegilut rinten klayan dalu kaliyan gesangipun ingkang dipun lampahi.
Rasul Paulus ingkang sampun mratobat paring paseksen. Sasampunipun nampi Yesus Kristus dados Juru wilujengipun, piyambakipun kabaptis lan dados utusan nggelaraken Injil. Piyambakipun ngrumaosi bilih “mungguh ing aku urip iku Sang Kristus” (Fil 1:21), liyane dadi ora pati penting. Piyambakipun sampun kaparingan gambar/peta rancangan kawilujenganipun Allah ing Sang Kristus tumrap jagad menika. Gesangipun samangkya namung mbangun turut supados laras kaliyan karsanipun Gusti Allah.
Kedadosan ingkang kita alami sadinten-dinten boten uwal saking campur astanipun Gusti supados kita mbangun turut ing timbalinipun. Sintena kemawon ingkang memulang kabeneran, paring tuladha utama saged dados lantaraning Allah ngereh lan nuntun kita ing margining Gusti. Makaten ugi kedadosan mrihatosaken ingkang kita tingali lan alami saged dados caranipun Gusti Allah melehaken utawi nuntun kita malih dhateng margi ingkang leres, menawi kita boten rumaos keminter lan mangkotaken manah tumrap pamerdinipun Gusti. (PAY)
„Aja gampang ngarani lan ngukumi menawa durung ngerti tenan“
