Waosan: Amos 9 : 11 – 15 | Pamuji: KPJ. 125
Nats: “UmatingSun Israel bakal Sunpulihake maneh, nuli padha mbangun maneh kutha-kutha kang wus gempur sarta banjur dienggoni, …” (Ayat 14a)
Tembung wanita ing basa Jawi punika saged dipun waos minangka akronim (singkatan saking 2-3 ukara) saking tembung: “wani ditata.” Punika gegayutan kaliyan adat lami, kados pundi tiyang estri punika kedahipun manut dhateng semahipun. Istilah punika ugi gegayutan kaliyan pemanggih bab kanca wingking, ingkang nedahaken bilih tiyang estri punika dados pandherek tumrap ingkang mimpin. Nanging kados pundi prekawis punika kita waos ing jaman samangke? Ing Pekan Wanita punika, kita dipun ajak ngraos-raosaken tema: Wani! Wani ingkang kados pundi?
Nalika kita mireng tembung wani, tamtu kita lajeng mbayangaken tiyang ingkang gagah nglawan mengsahipun. Ngawonaken prekawis ingkang dados pepalang gesangipun. Cekakipun kita langkung gampil nyebut tembung ‘wani’ punika kaliyan samukawis prekawis ing sakjawinipun dhiri kita. Kadospundi kaliyan ‘wani’ ngadepi dhiri? Punika ingkang kawartosaken dening Amos ing waosan dinten punika. Nabi Amos wantun ngengetaken umat Israel ingkang mboten nggatosaken kersanipun Gusti. Sandyan ing wusananipun Gusti nedahaken katresnanipun srana prajanji bab pamulihan, nanging punika sanes prekawis ingkang instan. Ing prajanji bab pamulihan punika, umat Israel dipun timbali supados wantun ngowahi dhiri, srana ngadepi panerakipun, lajeng mratobat. Prajanji bab pamulihanipun Gusti punika ngundang para umat-Ipun supados “wani ditata” dening Gusti Allah.
Minangka pandherekipun Gusti, mangga kita sinau dados ‘Wanita’, mboten ateges ingkang kakung lajeng macak kados tiyang estri, nanging tansah cumadhang lan ‘wani ditata’ dening Gusti. Kita lampahi gesang kanthi ngupadi karsanipun Gusti, mboten namung nuruti pikajeng kita piyambak. Mangga kita ngrumaosi kakirangan dhiri kita, lajeng kita ngupadi owahi tumindak gesang kita ingkang mboten sembada kaliyan karsanipun Gusti. Satemah prajanji bab pamulihan saking Gusti, sak estu saged kita raosaken ing pigesangan kita. Langkung-langkung tumrap kaum Wanita, mangga kita “wani ditata”, dados ibu, semah, pelados, pegawai, petani, lan punapa kemawon ingkang kadhawuhaken Gusti. Amin. [WER].
“Wani ditata ora ateges kita ringkih, nanging nedahaken karosaning Gusti.”
