Waosan: Jabur 34 : 9 – 15 | Pamuji: KPJ. 370
Nats: “… ngedahana piala, nglakonana kang becik, ngudia marang karukunan lan arahen nganti kecekel!” (Ayat 15)
Merdeka! Merdeka! Merdeka! Saben taun ing tanggal 17 Agustus, kita mengeti dinten kamardikan negri kita Indonesia. Ing taun punika, bangsa Indonesia mengeti HUT kaping 79. Sedaya rakyat rumaos bingah, karana wiwit saking proklamasi kawaosaken, kita sampun uwal saking penjajah. Bangsa kita sampun mboten dipun kwaosi dening para penjajah. Pengetan kamardikan punika ugi saged dipun wastani minangka puncak perjuangan bangsa nglawan penjajah ugi ngawonaken mengsah.
Seratan Juru Mazmur dinten punika ngajak kita sinau bab kamardikan, inggih punika kamardikan ingkang sejati. Kamardikan ingkang kagayuh mboten srana ngawonaken tiyang sanes, ananging kamardikan ingkang kawiwitan saking dhiri pribadi. Inggih punika, dhiri ingkang uwal saking raos manah ingkang awon, iri, drengki, saha nyalahaken tiyang sanes. Juru Mazmur ngajak kita supados saged gesang mardika tanpa mungsuh srana ngudi gesang rukun. Mboten namung ngupadi gesang mardika kemawon, Juru Mazmur ugi paring pitutur supados kita ngarah gesang kita ing karukunan. Suraosipun bab karukunan punika dados prekawis ingkang wigati lan dados landhesan gesang sesarengan. Sanadyan kita kawangun saking mawarni-warni suku, basa, pakulinan, adat, agama, lsp sampun ngantos prekawis punika ndadosaken kita crah, ananging kadospundi kemawon, kita kedah ngurmati kawontenan gesang sakiwa tengen ingkang mawarni-warni kalawau.
Nalika kamardikan ingkang sejati saged mawujud nyata, tamtu wohipun ngedap-edapi. Umpaminipun, ing gesang padintenan, kita mboten prelu malih masang CCTV awit ing antawisipun tangga tepalih sami gesang tulung-tinulung lan ajen-ingajenan, satemah lingkungan dados aman. Nalika sesrawungan, pirembagan ingkang kawangun ugi pirembagan ingkang nentremaken manah, mboten pirembagan ingkang nyinyir lan julid dhateng sesaminipun sanadyan benten pemanggih lan pilihan. Nalika wonten sedherek ingkang kasisahan, mangga kita sedaya nyengkuyung satemah sedherek kalawau saged ngadepi kasisahan lan nglampahi gesang salajengipun. 79 tahun bangsa kita mardika, ngawonaken penjajah. Samangke mangga kita gesang mardika tanpa mengsah, srana ngawonaken penggalih lan pemanggih awon, ngupadi kasaenan lan karukunan ing gesang padintenan. Amin. [WE].
“Kamardikan kang sejati kawiwitan saking diri lan ngener Kersaning Gusti”
