Waosan: Markus 8 : 27 – 38 | Pamuji: KPJ. 113
Nats: “Gusti Yesus tumuli nimbali wong akeh karo para sakabate sarta padha dipangandikani mangkene: “Saben wong kang arep ngetut-buri Aku, iku nyingkura marang awake dhewe, ngangkata salibe lan melua Aku.” (Ayat 34)
Saben tiyang nggadhah cariyos ingkang benten-benten nalika nampi timbalanipun Gusti, dados pandherek-Ipun. Wonten ingkang wiwit alit, awit tiyang sepuhipun sampun ndherek Gusti. Wonten ingkang karana dangu ngalami sakit lajeng nampi kasarasan, lajeng ndherek Gusti. Wonten ingkang karana ngalami pepanggihan kaliyan Gusti lumantar prastawa ing gesangipun, lsp. Dasar kita ndherek Gusti punika penting, awit gesang ingkang kelampahan lan badhe kelampahan ing gesang ngajeng punika mbetahaken iman ingkang kiyat. Bilih dasar iman kita mboten kiyat, saged kemawon kita semplah ing margi nalika kita ngalami prastawa ingkang awrat. Kados dene nalika tiyang sepuh nimbali kita lan kepengin kita enggal mangsuli timbalan punika, mekaten ugi Gusti Allah anggenipun nimbali kita sedaya. Panjenenganipun kepengin supados kita saged mangsuli kanthi cetha lan siyap.
Ing wiwitaning pepanggihan para sakabat kaliyan Gusti Yesus, para sakabat yakin menawi Gusti Yesus punika Sang Masih. Nanging para sakabat punika nggadhah pemanggih bilih Sang Masih punika kados pemimpin ing babagan politik. Nalika wekdal pepanggihan lan gesang kaliyan Gusti, sansaya kathah Gusti Yesus paring piwucal bab Panjenengan-Ipun dhateng para sakabat. Nalika Gusti Yesus paring pitakenan bab sinten Panjenenganipun, Petrus paring wangsulan kanthi cetha lan dados gegambaran saking wangsulan para sakabat sanesipun. Petrus ngakeni bilih Gusti Yesus punika Sang Masih ingkang dipun urapi dening Gusti Allah. Nanging ing pemanggihipun Petrus taksih kirang nalika piyambakipun mireng Gusti Yesus ngendika bilih Panjenengan-Ipun punika kedah nandhang sangsara, seda, sinalib lan wungu malih. Ing ngriki kita saged ningali bilih Petrus dereng siyap kaliyan kawontenan ingkang kedah kelampahan punika, inggih kasunyatan bilih Sang Masih kedah ngalami sangsara.
Kados dene Petrus ingkang dereng siyap ngadepi prekawis bilih Gusti Yesus punika Sang Masih ingkang kedah ngalami sangsara, mekaten ugi kita ing gesang padintenan. Kadangkala kita dereng siyap ngalami prekawis ingkang awrat salebeting gesang kita. Mugi timbalananipun Gusti dhateng kita, dadosaken kita nggadhah iman ingkang kiyat. Kita kiyat lan sagah nglampahi sedaya prastawa gesang sanadyan kadangkala kedah ngalami sangsara. Gusti Yesus tansah paring kakiyatan kangge kita. Amin. [GRA].
“Gusti maringi kasagedan ing sedaya timbalan-Ipun.”
