Waosan: Amos 5 : 1 – 9 | Pamuji: KPJ. 78
Nats: “Awit mangkene pangandikane Sang Yehuwah marang turune Israel: ‘Sira padha ngupayaa Ingsun, temah bakal urip!” (Ayat 4)
Gesang wonten ing jaman samangke, nedahaken bilih kathah pilihan kangge kita. Kathahing pilihan punika asring ndadosaken kita milih ingkang langkung cepet kagayuh lan enggal saged kita raosaken. Menawi kita sembrana anggenipun milih lan namung mentingaken kasenengan ingkang sipatipun mboten langgeng, saged kemawon kita dawah wonten ing kacilakan. Dawah ing gesang ingkang mboten dipun kersakaken dening Gusti Allah. Kathahipun persaingan wonten pundi-pundi, punika nedahaken bilih kathah manungsa ingkang kepengin sukses lan nggayuh punapa kemawon miturut pemanggihipun piyambak. Nanging ingkang asring kelampahan kathah tiyang ingkang nilar Gusti. Ngrumaosi bilih kasuksesan lan kasaenan ingkang dipun gayuh punika sampun cekap lan mboten mbetahaken Gusti Allah malih. Mugi gegambaran punika mboten kelampahan ing gesang kita. Wonten ing sedaya kahanan mugi kita kaparingan kasagedan gesang setya dhumateng Gusti.
Wonten ing waosan kita samangke, Gusti Allah ngengetaken Bangsa Israel supados sujud manembah lan madosi Panjenenganipun. Gusti Allah ngersakaken supados bangsa Israel mboten nindakaken ritual-ritual dhateng manembah dhateng brahala, kados ing Israel Utara (Betel lan Gilgal) lan ing Yehuda (Betsyeba). Karana gesangipun Bangsa Israel sampun mboten setya dhumateng Gusti Allah, mila Gusti Allah ndawahaken paukuman dhateng bangsa Israel. Wonten karusakan ing gesangipun bangsa Israel. Bangsa ingkang sampun dipun engetaken makaping-kaping punika, kedah mratobat supados ngalami pemulihan. Mila wujuding paukuman saking Gusti punika dados sarana kangge bangsa Israel supados langkung sae ing wekdal salajengipun.
Pilihan lan kesempatan dipun paringaken dhateng kita ing wekdal samangke. Menawi kita setya dhumateng Gusti Allah, tamtu kita nampi gesang ingkang kebak berkah, kawilujengan, lan pitulungan. Kosokwangsalipun, menawi kita mboten setya lan tumindak dosa, kita badhe nampi kacilakan, paukuman, saha kasisahan, ingkang ndadosaken gesang kita sisah lan sangsara. Sumangga kita saged milih ingkang sae, inggih punika milih gesang manut dhumateng karsanipun Gusti Allah. Awit namung wonten ing Gusti kemawon, kita saged ngraosaken katentreman lan kawilujengan ingkang tanpa winates. Amin. [GRA].
“Ndherek Gusti Allah tamtu pikantuk kawilujengan lan kakiyatan.”
