Waosan: Lelakone Para Rasul 6 : 8 – 15 | Pamuji: KPJ. 436
Nats: “Anadene Sang Stefanus iku penuh ing rahmat lan panguwasa, nganakake mukjijat-mukjijat lan pratandha-pratandha ana ing antarane wong akeh.” (Ayat 8)
Bukti nyata menawi kita sampun nampi kawilujengan saking Gusti Yesus, inggih punika gesang kita ngedalaken woh karohanen. Gesang kita dados berkah tumrap tiyang sanes. Lan kita mboten ajrih ngadhepi kawontenan gesang ingkang kados pundi kemawon, awit kita pitados wonten Gusti Yesus lan Sang Roh Suci ingkang dedalem ing manah lan gesang kita. Sanadyan kawontenan ing sakiwa tengen kita nggegirisi, kita pitados pitulunganipun Gusti Allah tansah nyata kangge kita. Punapa malih menawi ingkang kita tindakaken punika kagem pakaryanipun Gusti piyambak.
Stefanus kalebet tiyang ingkang setya dhumateng Gusti. Paladosanipun sae sanget ing satengahing pasamuwan. Piyambakipun kaparingan panguwaos saking Gusti kangge ngawontenaken mukjijat. Ing wekdal semanten, Stefanus ngadhepi tantangan saking tiyang Yahudi ingkang nyebat dhirinipun Libertini. Para tiyang Yahudi punika mboten remen kaliyan paladosanipun Stefanus. Mila para tiyang punika nggadhahi niat kangge ngukum lan mejahi Stefanus. Kangge mujudaken niatipun punika, para tiyang Yahudi punika nyebaraken fitnah dhumateng tiyang kathah bab Stefanus. Saestu kejam sanget punapa ingkang dipun tindakaken tiyang Yahudi punika. Wonten ing kahanan ingkang mboten sae punika, Stefanus tetep pitados dhumateng Gusti. Stefanus tetep siap lan kiyat ngadepi sedaya kawontenanipun punika.
Stefanus saged dados tuladha kangge kita, anggenipun kita tetap siap lan kiyat ngadepi sedaya kawontenan gesang punika. Menawi ing gesang padintenan kita ngalami prekawis ingkang awrat, sangsara, lan sisah, sumanga kita tetap pitados dhumateng Gusti. Kita pitados wonten pitulungan saking Gusti Yesus, ingkang ngiyataken kita. Kita saged ngadhepi kahanan gesang ingkang awrat punika srana nunggil ing Gusti. Pramila, sumangga kita tansah siap lan kiyat kangge ngadhepi sedaya tantangan, panggodha, sarta pacoban gesang punika. Mangga kita tetep setya nindakaken karsanipun Gusti kanthi sae. Kita pasrahaken sawetah gesang kita namung wonten ing astan-Ipun Gusti. Srana punika, kita tansah ngraosaken sih rahmat saha pitulunganipun Gusti dhateng kita. Amin. [GRA].
“Gusti nuntun lampah kula, saklangkung nggen kula begja.”
