Waosan : Ibrani 11:17-22 I Pamuji: KPJ 122:1-2
Nats: “Marga saka pracaya Rama Abraham nalika kacoba, ngurbanake Iskak. Panjenengane kang wus kaparingan prasetya, lila ngurbanake putrane ontang-anting” (Ibrani 11:17)
Satunggaling dinten, Adi ingkang saweg umur 8 taun ngalami sakit. Badanipun benter, pilek lajeng watuk-watuk. Wiwit saking alit, Adi anggadahi dokter anak langganan. Bapakipun lajeng ngajak Adi periksa dhateng dokter anak langgananipun. Ananging sareng dumugi wonten ing panggenan praktek dokter, kanyata dinten punika dokter anak mboten praktek. Adi lan bapakipun lajeng wangsul kanthi ngliwati margi dalemipun dokter anak kala wau. Sareng ing griya, Adi tilem. Nalika tangi saking tilem, kanyata sakitipun pulih. Badanipun Adi sampun mboten benter malih, sampun mboten pilek malih, sampun mboten watuk malih. Bapakipun lajeng ngendika “Welah, mung kangen ndelok omahe Pak Dokter ta? Ora perlu periksa malah wis mari.” Karana pitados bilih Dokter saged ngusadani sesakit, namung ningali griyanipun kemawon Adi sampun mantun.
Semanten wigatosing kapitadosan. Tanpa kapitadosan, sedaya dipun tindakaken kanthi ganggam. Ibrani 11:17-31 nyariosaken bilih menapa ingkang dipun tindakaken dening Rama Abraham, Iskak, Yakub, adipati Yusuf, nabi Musa lan sanes-sanesipun linandesan pitados dhateng Gusti. Nalika Rama Abraham kedah masrahaken Iskak putranipun temtu sanes pilihan ingkang gampil. Kados pundi mboten, anggenipun Rama Abraham lan Ibu Sara ngantu-antu mijilipun putra ing satengahing brayat sampun semanten dangunipun. Sareng sampun lair, Gusti Allah ngersakaken Iskak dipun pasrahaken malih dhateng Gusti Allah. Kanthi kapitadosanipun ingkang satuhu, Rama Abraham lajeng sumadya masrahaken Iskak dhateng Gusti Allah (11:19).
Semanten wigatosing pitados dhateng Gusti. Menawi kita mboten anggadhahi kapitadosan dhumateng Gusti, kita lajeng ganggam utawi gojak-gajek anggenipun nindakaken kersanipun Gusti. Menapa ingkang dipun kersakaken dening Gusti kadangkala mboten sami kaliyan menapa ingkang kita ajeng-ajeng. Nanging kados dene Rama Abraham ingkang pitados bilih kersanipun Gusti Allah tundanipun kasaenan, pramila sumangga kita pitadosaken gesang kita sawetah wonten ngarsanipun Gusti. Nindakaken kersanipun Gusti, sanadyan kadangkala ketingal awrat lan mokal. (ANS)
“Pitados dhumateng Gusti ing sadhengah lampah gesang kita”
