Waosan: Jabur 85 : 8 – 14 | Pamuji: KPJ. 51
Nats: “Sanyata, karaharjan kang saka ing Pangeran iku cepak tumrap wong kang wedi-asih marang Panjenengane, …” (Ayat 10a)
Badu getun mboten mirengaken rama-ibunipun. Dipun utus sekolah nanging mboten purun. Langkung remen nindhakaken prekawis-prekawis nglaha. Piyambakipun nembe saged ngraosaken awrating lelampahan gesang sarta ewetipun nyambut damel awit mboten kagungan katrampilan utawi ilmu ingkang cekap. Sinaosa sampun kaapunten dening tiyang sepuhipun, Badu kedah nanggel kasangsaran awit saking pambalelanipun.
Saben tiyang mesthi ngundhuh wohing pakartinipun, kalebet umat Israel ingkang nerak angger-anggeripun Gusti. Estunipun Gusti sampun ngluwari umat-Ipun saking tanah pambucalan. Sinaosa mbalela, ananging Gusti mboten negakaken. Piawonipun kaapunten, hak tumrap tanah ingkang kaprasetyakaken kapulihaken. Nanging sinaosa mekaten, umat kedah nampi akibat saking tumindak awonipun. Mulihaken kawontenanipun Israel ingkang risak awit saking piawonipun, mbetahaken proses, mboten saged instan. Kutha ingkang lebur, tanah ingkang mboten ngasilaken woh, ekonomi ingkang morat-marit, kados-kados Gusti Allah taksih duka dhateng umat-Ipun Israel. Mila ing pandonganipun, umat Israel nedahaken pangajeng-ajengipun dhateng pitulunganipun Gusti Allah, mbayangaken kawontenan gesang, ing pundi katentreman, karahayon, saha kaadilan sumrambah.
Nerak angger-anggeripun Gusti asring nuwuhaken kasangsaran lan momotan ing gesang kita. Sinaosa Gusti Allah karsa ngapunten panerak kita, kita mboten saged nilar tanggel jawab lan akibatipun. Kahanan punika asring njalari kita ajrih lan kuwatos bilih Gusti Allah taksih duka, satemah kita nampi paukuman. Pangapunten punika penting, ananging proses pemulihan ugi penting. Gusti Allah ingkang ngapunten kalepatan kita ugi paring kakiyatan tuwin pitulungan dhateng kita kangge mbangun gesang enggal. Pramila saksampunipun kita nampi pangapunten saking Gusti, kita prelu masrahaken dhiri kita dhateng tuntunaning Sang Roh Suci supados kita kasagedaken nanggel akibatipun kanthi legawa. Mangga kanthi andhap asor, kita purun katuntun nglampahi pitobat, mbudidaya gesang ingkang langkung sae, mbangun turut karsanipun Gusti sarta purun sinau saking panggulawentahipun Gusti temahan kita sansaya wicaksana. Awit karaharjan ingkang saking Gusti Allah cumawis kangge kita ingkang tansah ajrih-asih dhumateng Panjenenganipun. Amin. [wdp].
“Awrating proses kapulihaken saking karisakan awit dosa ingkang kita lampahi minangka panggulawenthahipun Gusti supados kita mboten sembrana.”
