Waosan: Yokanan 6: 35, 41 – 51 | Pamuji: KPJ. 346a
Nats: “Aku iki roti kang urip, kang wus tumurun saka ing swarga. Manawa wong mangan roti iki, bakal urip ing salawas-lawase. Anadene roti bakal pawewehKu, yaiku daging-Ku, kang bakal Dakwenehake kanggo uripe jagad.” (Ayat 51)
Roti ing jamanipun Gusti Yesus punika dados tetedhan pokok. Wonten ing waosan kita dinten punika, Gusti Yesus mratelakaken bilih Panjenenganipun punika ingkang dados sumbering pigesangan, “Roti kang urip”. Gusti Yesus paring prajanji sintena kemawon ingkang marek sowan dhumateng Panjenenganipun mboten badhe ngraosaken luwe dan ngelak malih. Bab punika ngemu pangertosan bilih Gusti Yesus kepareng ngewahi pamikiran ingkang asring klentu. Punika sanes bab roti sacara jasmani, nanging pralambang bab sesambetan antawisipun karohanen lan gesang langgeng lumantar iman dhumateng Gusti Yesus. Gusti Yesus paring piwucal tumrap tiyang kathah supadosa ngupadi samukawis ingkang langgeng lan mboten namung mancep ing prakara-prakara ingkang kasat mripat.
Bab “Roti kang urip” punika paring pangertosan bilih Gusti Yesus dados sumbering pigesangan karohanen. Mawi sowan lan pitados dhumateng Panjenenganipun, tiyang pitados bakal nampi gesang langgeng lan kamareman ingkang mboten saged katamtokaken ing prekawis-prekawis kadonyan. “Roti kang urip”, punika ndadosaken tiyang pitados nglampahi gesang sejati. Mboten namung saderma gesang, nanging gesang ingkang saged amberkahi tiyang sanes amargi sampun nuladha tumindakipun Gusti Yesus. Tumindakipun Gusti Yesus ingkang kawujud lumantar pakaryan lan paladosanipun: ngusir setan, paring kesarasan tiyang sakit, lan mbela hak tiyang katindhes. Gusti Yesus sampun rawuh kangge paring pitulungan dhumateng tetiyang ingkang “kasisih” lan kaum marginal.
Ing salebting wulan Pambangunan punika, GKJW minangka greja ingkang kawangun dening Sang Kristus, perlu “evaluasi dhiri” ing bab pakaryan paladosanipun. Wiwit sasi Januari ngantos dumugi sasi Desember greja sami repot lelados. Leres! Nanging, sumangga kita mboten namung repot ing bab pambangunan kajasmanen kemawon, mangga kita ugi purun repot ing bab pembangunan bathiniah manungsa: inggih punika ngiyataken, nglipur, paring daya (memberdayakan), paring pangurmatan, lan ngupadi katentreman, punika ingkang dados tujuanipun greja, sami lelados linadosan. Amin. [ES].
“Swawi mangun gesang ingkang sae saking lebeting manah, sanes ingkang ketingal sae saking jawi.”
