Waosan: 1 Yokanan 2 : 18 – 25 | Pamuji: KPJ. 136 : 1, 2
Nats: ”Asale Anti Kristus iku pancen saka ing antara kita, nanging sanyatane padha dudu panunggalan kita.” (Ayat 19a)
Pasamuwan punika nggadhah ayahan ingkang elok, inggih punika Persekutuan (Koinonia), Kesaksian (Marturia), lan Pelayanan (Diakonia), ingkang dipun wastani Tri Tugas Gereja. Tetiga tugas punika setunggal lan setunggalipun mboten saged kapisahaken, tansah sesambetan setunggal lan setunggalipun. Mila ing ayahanipun, pasamuwan punika mujudaken wontenipun persekutuan ingkang bersaksi kanthi lelados (melayani). Mekaten ugi anggenipun bersaksi, kanthi lelados, sesarengan mujudaken persekutuan. Menawi tri tugas pasamuwan punika kalampahan kanthi sae, gambaripun pasamuwan nggih elok, nanging kosok wangsulipun, menawi tri tugas pasamuwan punika mboten sae, tamtu gambaripun pasamuwan kirang elok, lan sampun samesthinipun menawi pasamuwan punika ngupaya ngetingalaken gambar ingkang elok.
Waosan ing dinten punika nggambaraken kawontenanipun pasamuwan ingkang aben-ajeng kaliyan Anti Kristus. Kasebataken bilih Anti Kristus punika asalipun saking antawisipun pasamuwan piyambak, saged dipun wastani ada musuh dalam selimut, utawi ada duri dalam daging. Kasebataken ing ayat 2: “Asale Anti Kristus iku pancen saka ing antara kita, nanging sanyatane padha dudu panunggalan kita.” Lajeng sinten ingkang dipun wastani Anti Kristus punika? Saged ugi oknum ingkang mboten setya tuhu, lamis, atur paseksi goroh, lan sapanunggalanipun, ingkang ngrisak gambaripun pasamuwan ingkang sae, inggih punika pasamuwan ingkang setya tuhu dhumateng Gusti Yesus lan ngugemi dhawuh-Ipun. Dene tiyang ingkang mboten setya tuhu lan ngugemi dhawuhipun Gusti punika, pancen wonten ingkang manunggil ing pasamuwan, nanging kasunyatanipun mboten nunggil. Punika ingkang dipun wastani Anti Kristus, ingkang wusananipun saged ngrisak gambaripun pasamuwan ingkang endah.
Wulan Oktober punika, kita para warga GKJW mlebet ing wulan Ekumene. Ing wulan punika kita dipun engetaken sanadyan kawontenanipun greja warninipun kathah sanget, nanging sadaya sami ngakeni bilih greja punika gegelitanipun Sang Kristus. Pramila kangge ngadhepi Anti Kristus, kita kedah nggadhahi semangat nyatunggil ing Sang Kristus. Greja ingkang kawontenanipun mawarni-warni punika sampun ngantos ngrisak gambaripun pasamuwan, nanging kedah sansaya semangat damel elok ing pasamuwan. Amin. [YK].
”Greja prasasat baita neng tengah samodra, Kristus kang dadi panutan, mula aja nganti nyingkur Gusti.”
