Waosan: Lukas 21 : 25 – 36 | Pamuji: KPJ. 231 : 1, 3
Nats: ”Apadene bakal ana ilapat-ilapat ing srengenge, ing rembulan, lan ing lintang-lintang, sarta ing bumi, para bangsa bakal padha wedi lan bingung marga saka gumlegering segara lan alun.” (Ayat 25)
Kasebataken bilih rawuhipun Putraning Manungsa (Gusti Yesus) tandha-tandhanipun ketawis nggegirisi sanget, rembulan, lintang-lintang, saha surya kawontenanipun nuwuhaken raos ajrih lan bingung, ugi wonten gumlegering swanten saking seganten. Tandha-tandha punika punapa dipun sengaja dipun tedahaken supados umat sami ajrih lan bingung? Wangsulanipun: saged ugi, supados umat mboten nyepelekaken pangwaosipun Gusti. Nanging menawi kita gatosaken, ing suwalikipun tandha-tandha ingkang nggegirisi punika sejatosipun nedahaken iba agenging katresnanipun Gusti Allah dhateng umat. Awit kanthi maringi tandha-tandha ingkang nggegirisi punika, wusananipun tuwuh raos pasrah, sumendhe saestu, lan mboten badhe sembrono saking para umat. Mila anggenipun mapag rawuhipun Gusti punika dipun lampahi kanthi raos ajrih asih. Lan raos urmatipun dhateng Gusti saya tuwuh, mboten badhe sembarangan sagah ngugemi awisan punika, kasagahan punika wujudipun sikap konsisten.
Tandha alam kados gumlegering swanten ombak seganten, pancen nggegirisi, ndadosaken raos ajrih lan bingung, kangge umat ingkang mboten wanuh kaliyan Gusti, nanging kangge para umat ingkang sampun wanuh, mesthinipun sampun siap lan mangertos, punika tandha-tandha saking Gusti piyambak ingkang martosaken bilih Panjenenganipun badhe rawuh. Mila mboten badhe ajrih lan bingung krana rawuhipun Gusti punika mbeta berkah karahayon, mitulungi tiyang dosa. Mila umat kasuwun cecawis kanthi tumemen, mboten asal-asalan.
Dinten punika, kita tumapak wonten ing sasi Desember, adatipun warga pasamuwan, lan umat Kristen sanesipun milai sibuk kangge riyadin natal. Asring anggenipun cecawis dhiri sibuk lelados kangge dhirinipun pribadi, brayatipun, relasinipun. Bab punika pancen wajar, ingkang mboten wajar, bilih kita mboten maringi papan lan wekdal kagem Gusti. Gusti kasisihaken, bab punika sampun ngantos kalampahan ing gesang kita. Lumantar tandha-tandha alam saking Gusti, kita dipun engetaken supados kita nyawisaken manah lan gesang kita kanthi raos ajrih asih dhumateng Gusti, awit Gusti Yesus Putranipun Allah, mesthi rawuh. Amin. [YK].
”Wedi asih marang Yehuwah iku wiwitaning kawruh.” (Wulang Bebasan 1:7a)
