Waosan: Zakaria 14 : 1 – 19 | Pamuji: KPJ. 241
Nats: “Sang Yehuwah nuli bakal jumeneng Ratu, misesani salumahing bumi.” (Ayat 9)
Sinten ingkang nggadhah panguwaos ingkang ageng ing gesang kita? Ing jaman ingkang sangsaya majeng samangke, mbok menawi wonten ingkang nggadhahi pemanggih bilih media sosial punika dados panguwaos ingkang ageng. Awit media sosial punika saged ndadosaken manungsa kepincut nglampahi punapa kemawon. Pancen leres, menawi kita mbikak media sosial, kita gampil manggihaken pawartos lan pengertosan punapa kemawon ingkang kita betahaken. Sae prekawis ingkang sae ugi ingkang awon, awujud seratan, gambar, lan video. Mekaten ugi pawartos lan pengertosan bab sosial, ekonomi, kabudayan lan sanesipun, saged kita panggihaken kanthi gampil. Kawontenan ingkang kados mekaten kalawau saged dadosaken kita dhawah, awit kawontenan gesang kita gumantung media sosial. Kita rumaos bilih media sosial saged mangsuli pitakenan punapa kemawon lan maringi pawartos dan pangertosan punapa kemawon kangge kita. Lajeng kita saged kajebak mapanaken media sosial punika kados “ratu” ingkang nggadah panguwaos ageng salebeting gesang kita. Pungkasanipun kita supe dhumateng Gusti Allah Sang Ratuning Jagad.
Ing waosan kita dinten punika, kita dipun engetaken sinten sajatosipun ratuning jagad punika? Ayat 9 nyebataken, “Sang Yehuwah nuli bakal jumeneng Ratu, misesani salumahing bumi.” Nabi Zakaria paring paseksi bilih namung Gusti Allah kemawon ingkang dados ratu ing salebeting gesang para pitados. Lan Ratu punika kita tepangi wonten ing Gusti Yesus Kristus, Gusti Allah ingkang rawuh ing donya. Mboten wonten kakiyatan lan panguwaos sanesipun ingkang saged nglangkungi panguwaosipun Gusti.
Media sosial punika pancen migunani kangge kita, nanging sampun ngantos media sosial punika ndadosaken kita supe lan nilaraken Gusti Allah. Media sosial punika sejatinipun namung sarana kita kangge nglampahi gesang, sampun ngantos kita kajebak ngegung-ngegungaken media sosial punika ngawonaken Gusti Allah. Mangga kita ginakaken media sosial punika kanthi wicaksana, manut kabetahan kita. Mekatena ugi kita dadosaken media sosial kita punika dados sarana anggen kita nyekseni lan martosaken pakaryanipun Gusti ing salebeting gesang kita. Amin. [SWT].
“Ratu Mulya ratu saking swarga, tedhak donya jumeneng Pantara.”
