Waosan: 2 Kor. 13:5-13 | Pamuji: KPK 192:1-4
Nats: “Dene kang padha dak suwun, yaiku supaya kowe dadi sampurna.” (ay. 9b)
Nalika ningali para ibu ndhèrèkaken lan kersa nenggani yoganipun ngaji ing salah setunggale TPQ, kula mbatos: ”Wuih…tiyang sepuh punika sae, awit kersa kanthi estu nggatosaken kabetahan rohani putra-putrinipun, matemah kersa ndhèrèkaken malahan ugi nenggani yoganipun ngaji”. Nanging kenging punapa ing pasamuwan X mboten saged kados mekaten? Kelas kataksasi anak, namung sekedhik ingkang ndherek. Kamangka saben Minggu dipun wartosaken wonten kataksasi anak, lan para tiyang sepuh kapurih ngengetaken yoganipun. Nanging nyatanipun ingkang ndherek kataksasi tetep kemawon, namung sekedhik. Kok saged kados mekaten? Bilih sedaya punika wau kelampahan kados mekaten terus, lajeng kados pundi iman kapitadosanipun anak-anak kita saged tuwuh kanthi sae?
Rasul Paulus nggadhahi pangajeng-ajeng supados kapitadosanipun Warga Pasamuwan ing Korinta saged saya kiyat lan sampurna. Awit lumantar iman (pracaya) ingkang kiyat lan sampurna punika warganing pasamuwan Korinta saged ngadhepi piwulang nasar (ajaran sesat) ingkang wonten ing satengah-tengahing pasamuwan Korinta. Pangajeng-ajengipun Rasul Paulus punika dipun wujudaken lumantar pambudidayanipun nggatosaken kawontenanipun Pasamuwan Korinta. Menawi dipun betahaken, Rasul Paulus purun ngasoraken diri lan ugi ngurbanaken diri, ingkang penting warga Pasamuwan Korinta sangsaya kiyat kapitadosanipun.
Minangka tiyang sepuh, kita saged sinau saking Rasul Paulus. Kita kedah purun ngasoraken diri lan ugi ngurbanaken diri nalika kita nggulawenthah para putra-putri kita, supados anak-anak kita saged ngalami tuwuhing kapitadosan. Nalika kita mbaptisaken yoga, kita sampun janji nuntun lan nuladhani anak-ana kita. Lha…mangga, janji punika kita wujudaken. Kita dados tiyang sepuh ingkang estu nggatosaken karohanenipun anak-anak kita. Mangga kita engetaken, kita teraken anak-anak kita nalika wonten program pembinaan iman ing greja, kadosta kebaktian anak, kataksasi, lsp. supados anak kita nggadhahi kapitadosan ingkang kiyat. Lumantar iman ingkang kiyat punika anak-anak kita saged dados pribadi inkang tahan uji. [dc]
“Nuwuhaken kapitadosan ingkang kiyat mbetahaken pambudidaya.”
