Waosan: Rum 5 : 6 – 11 | Pamuji: KPJ. 117
Nats: “… Sang Kristus wus nglampahi seda kanggo kita para wong duraka.” (Ayat 6)
Tiyang ingkang nate dipun larani lan mboten purun paring pangapura punika, sejatosipun kadosdene tiyang ingkang ngunjuk racun, nanging tiyang sanes ingkang dipun suwun seda. Ukara punika sami kaliyan penelitian bab kepahitan ingkang asilipun: kepahitan punika nglairaken raos depresi, stres, salah, ajrih, nesu, raos dipun tolak, lan sedih. Sangsaya dangu, punika saged ngrisak kelenjar adrenalin. Kelenjar adrenalin punila salah satunggaliing kelenjar ingkang ngasilaken hormon ingkang gegayutan kaliyan stress lan emosi.
Waosan kita ing kitab Rum 5:6-11 negesaken bilih sejatosipun Sang Kristus punika sampun kersa ngurbanaken Sariranipun kangge kita, nalika kita taksih gesang ing dosa (Ay. 6). Sang Kristus punika sampun ngetingalaken sih-Ipun dhateng manungsa nalika manungsa taksih kawengku ing dosa (Ay. 8). Punika nggadhahi teges bilih sadaya dosa, panerak dhateng angger-anggeripun Allah, Gusti Allah kersa paring pangapura lan mboten kecalan katresnan-Ipun dhateng manungsa. Pangapuraning Gusti Allah punika mulihaken hubungan tiyang dosa kaliyan Panjenenganipun, mekaten ugi dados tuladha kangge manungsa supados paring pangapura dhateng sesaminipun. Pangapuraning Gusti Allah ugi negesaken dhateng manungsa supados gesang tresna tinresnan.
Bab positif ingkang kita raosaken menawi kita paring pangapura inggih punika: hubungan kita kaliyan sesami saged dipun pulihaken, ingkang mboten kalah penting ndadosaken kita langkung sehat. Kita langkung sehat amargi nalika kita paring pangapura, kita badhe ngraosaken tentrem rahayu ing gesang kita. Paring pangapura dhateng kalepatanipun sesami punika, mboten ateges kita kebal lan mboten ngraosaken manah ingkang sakit. Nanging, paring pangapura punika pilihan supados gesang kita entheng, amargi kita purun ngeculaken raosing sakit ing manah. Mangga kita pasrahaken sadaya momotan gesang kita dhumateng Gusti Allah. Sadaya prekawis ingkang ndadosaken manah kita sakit, mangga sami kita bucal, tebih saking gesang kita. Kita pitados Gusti Allah ingkang mranata gesang kita, matemah kita tansah sehat lair batin saha ngraosaken tentrem rahayu ing gesang kita. Amin. [bk].
”Paring pangapura dhateng sesami ndadosaken badan kita sehat lan gesang kita entheng.”
