Waosan : Yesaya 41 : 14 – 20 | Pamuji : KPK 123
Nats: “Para wong kang sangsara lan kang miskin lagi padha golek banyu, nanging ora oleh, ilate padha garing marga kasatan; nanging Ingsun Yehuwah, bakal minangkani kabutuhane wong-wong mau, … Ingsun ora bakal negakake wong-wong mau.” [ayat 17]
Tiyang ingkang sangsara lan miskin umumipun boten dipun gatosaken dening tiyang sanes, mliginipun dening tiyang ingkang boten rekaos lan miskin. Ingkang langkung dipun sawang nggih menika tiyang ingkang mulya lan sugih, tiyang ingkang boten rekaos lan miskin gesangipun. Kenging menapa kok mekaten? Karana tiyang sangsara lan miskin menika boten nggadhahi lelabuhan dhateng tiyang sanes. Boten wonten prekawis ingkang ngremenaken saking tiyang sangsara lan miskin. Wontenipun namung kawontenan ingkang mrihatosaken. Boten wonten ingkang saged dipun ajengaken saking tiyang sangsara lan miskin. Pramila namung sekedhik sanget tiyang ingkang nggatosaken tiyang sangsara lan miskin.
Ing antawisipun ingkang sekedhik sanget ingkang nggatosaken tiyang sangsara lan miskin menika, inggih Sang Yehuwah Allah. Panjenenganipun saestu nggatosaken, malah mitulungi lan boten badhe negakaken tiyang sangsara lan miskin. Menika nedahaken bilih ingkang njalari tiyang ngalami sangsara lan miskin menika sanes Yehuwah Allah. Wiwit wiwitan mila Panjenenganipun ngersakaken manungsa titahipun ngalami kacekapan, malah kaluberan lan katentreman. Pramila, saderengipun katitahaken, manungsa sampun dipun cawisi samukawis kabetahanipun srana Allah nitahaken jagad saisenipun.
Yehuwah Allah nggatosaken lan mitulungi tiyang sangsara lan miskin, karana kawigatosan lan pitulunganipun Allah menika boten kadhasaraken dhateng lelabuhanipun manungsa. Panjenenganipun boten ngajeng-ajeng menapa-menapa saking tiyang sangsara lan miskin kagem Panjenenganipun pribadi. Ingkang dipun angkah dening Yehuwah Allah namung uwalipun tiyang sangsara lan miskin saking panandhangipun, namung karaharjan lan kacekapanipun. Mekaten ugi ingkang kedahipun kita tindakaken dhateng tiyang sangsara lan miskin. [st]
“Kaluhurna dening Yehuwah Allah tiyang ingkang nggatosaken lan mitulungi tiyang sangsara lan miskin!”
