Waosan : Filipi 1 : 3 – 14 | Pamuji : KPK 104 : 2, 3
Nats: “Aku ngunjukake panuwun marang Allahku marga saka anggonmu tetunggalan ing bab Kabar Injil wiwit ing dina wiwitan nganti seprene.”[ayat 5]
Sekar ingkang endah menawi namung piyambakan saged nuwuhaken raos trenyuh lan prihatos, nadyan endah, amargi boten wonten tunggilipun. Menawi sekar endah menika makempal kaliyan sekar sanesipun badhe saya ketingal endahipun. Menawi sekar endah menika makempal kaliyan sekar endah sanesipun badhe saestu mbingahaken, badhe ndamel tiyang boten bosen-bosen nyawang, badhe ndamel tiyang kepengin langkung dangu cecaketan ing panggenanipun.
Mekaten ugi tumraping tiyang pitados. Menawi tiyang pitados menika namung nyeje piyambak lan boten tetunggilan kaliyan tiyang pitados sanesipun, nadyan bakuh imanipun, saged nuwuhaken raos trenyuh lan prihatos. Ingkang rumaos trenyuh lan prihatos menika saged ugi Gusti Yesus pribadi. Kosokwangsulipun Gusti Yesus badhe rumaos bingah menawi mirsani para pendherekipun sami tetunggilan kaliyan sanesipun, amargi badhe ketingal endah. Menapa malih menawi tetunggilaning tiyang pitados menika wonten ing salebeting kayekten lan kaadilan (Kabar Injil), Gusti Yesus badhe saya bingah. Gusti Yesus badhe tansah cecaketan ing ngriku.
Lah mekaten ugi kabingahanipun Rasul Paulus tumrap tetunggilanipun tiyang pitados ing Filipi. Temah Rasul Paulus kapang (kangen) lan kepengin sanget ndherek tetunggilan ing ngriku. Nanging Rasul Paulus boten saged nyembadani pepinginanipun, karana Paulus saweg wonten ing lebeting pakunjaran. Ewasamanten, Paulus tetep ngunjukaken panuwun dhumateng Allah atas tetunggilanipun para tiyang pitados ing Filipi menika.
Tetunggilan menika boten namung mbingahaken pihak sanes, nanging ugi badhe nuwuhaken kabingahan tumrap ingkang sami tetunggilan. Pramila saking menika, sampun ngantos kita “aras-arasen” tetunggilan kaliyan sedherek tunggil pitados. Sampun ngantos kita mungel: “Sing penting aku tetep precaya marang Gusti Yesus. Ora melu-melu kegiatan pasamuwan ya ora apa-apa… Gusti Yesus mesthi pirsa isining atiku.” Gusti Yesus ngersakaken kita remen tetunggilan kaliyan sedherek tunggil pitados lan malah ugi tetunggilan ing bab Kabar Injil kaliyan tiyang sanes kapitadosan. [st]
“Endah lan bungahing urip iku yen kita padha tetunggalan.”
