Waosan: Galatia 5:1, 13-25 | Pamuji: KPK 206: 3, 4.
Nats: “Déné wohé panuntuning Sang Roh Suci yakuwi: Katresnan, kabungahan, katentreman, sabar, sarèh, sumlondhoh, kabecikan, setya, andhap-asor, ngwasani awaké dhéwé. Ora ana angger-angger sing nglawan prekara-prekara sing mengkono mau.” (ayat 22-23)
Mbokmenawi kita taksih kemutan kaliyan lagu ingkang dipun kondhangaken dening Broery Marantika, ingkang kados makaten : “…buah semangka berdaun sirih. Aku begini engkau begitu sama saja.“ Tamtu punika mokal sanget bilih semangka mijil saking witipun suruh. Semangka tamtu mijil saking wit semangka lan suruh mboten badhe nuwuhaken woh semangka. Bilih punika kelampahan tamtu donya punika badhe kisruh sanget.
Makaten ugi gesang kita, bilih tuking gesang kita punika Sang Roh Suci mila kita ugi badhe nuwuhaken woh-wohipun Sang Roh Suci. Punika saged dipun titik saking tumindakipun sadinten-sadinten ingkang kebak katresnan dhumateng sinten kemawon. Bilih wonten tiyang ingkang ngaku-aku kepanjingan Sang Roh Suci ananging gesangipun tebih saking katresnan tamtu kita sedaya mangertos bilih tiyang punika kados tembangipun Broery kalawau…buah semangka berdaun sirih… mokal kelampahan.
Supados kita saged nuwuhaken woh-wohanipun Sang Roh Suci, kita kedah ndadosaken piwucalipun Gusti Yesus dados tuking gesang kita. Awit Gusti Yesus piyambak ingkang paring dhawuh bilih Sang Roh Suci punika badhe dipun paringaken dhateng tiyang ingkang pitados lan badhe nyarengi lampahing gesangipun tiyang ingkang pitados ( Yokanan 14: 15-17, 26). Menawi kita tebih saking piwucalipun Gusti Yesus tamtu Sang Roh Suci ugi mboten nyarengi gesang kita.
Bab ndadosaken Gusti Yesus minangka tuking gesang mboten saged kelampahan kados dene sulap. Punika mbetahaken proses temah piwucalipun Gusti punika dados pakulinaning gesang. Pramila bab nindakaken dhawuhipun Gusti kedah dipun wucalaken nalika lare-lare taksih alit. Amargi menawi kita kepingin panen semangka, mila kita kedah ndhedher wiji semangka. Sumangga kita ndadosaken woh-wohipun Sang Roh Suci punika dados gaya hidup, dados pakulinan temahan para yoga lan wayah saged nuladhani lan ugi ndadosaken tuking gesangipun. [AM]
“Wit kang tuwuh becik bakal uwoh becik.”
