Waosan : Zakharia 6 : 9 – 16 | Pamuji : KPJ 192 : 1 – 3
Nats: “Anadene makhuta iku bakal kasimpen ana ing padalemane Sang Yehuwah, minangka pengeling-eling …”[ayat 14a]
Pakaryane Sang Yehuwah ing satengahing umatipun kathah sanget ingkang wujud patilasan ingkang dados pangeling-eling. Alam ndonya sak isinipun, angkasa ugi dados pangeling-eling dhumateng pakaryanipun Sang Yehuwah. Sacara mirunggan kita pinaringan pangeling-eling dhumateng pakaryanipun Sang Yehuwah lumantar Kitab Suci, ingkang dados seratan paseksi pakaryan agung ing gesanging manungsa; pakaryan, nugraha tuwin sengsara sedani sinalibipunpun Gusti Yesus Sang Kristus.
Ing jaman Imam Agung Yusak bin Yozadak kang ajejuluk Sang Trubusan (12), umatipun Sang Yehuwah kocar-kacir; wonten ingkang taksih kintun ing tanah pembuangan, nanging wonten ugi ingkang sampun wangsul dhateng tanah prajanjian (10). Ing wekdal punika pengeling-eling dhumateng pakaryanipun Sang Yehuwah sampun sirna (13). Pramila perlu wonten wujuding pangeling-eling ingkang dados bukti bilih Sang Yehuwah tansah nunggil kaliyan umatipun ingkang tansah midhangetaken sabdanipun Sang Yehuwah (14).
Wujuding pakaryanipun Sang Yehuwah ing satengahing manungsa saged kapilah dados kalih: (a) Langit bumi sak isinipun; kaendahaning lan ganda aruming sekar, pangocehe peksi, sato kewan ing pasuketan, lintang abyor ing dalu, gumlegering gludug ing angkasa tuwin lubering toya dan gumlegering ombak ing samudra. Mekaten ugi pigesanganing manungsa sadinten-dinten; ing babagan politik, ekonomi, sosial budaya lan pertahanan keamanan, (b) Sabdanipun Sang Yehuwah ingkang kaserat ing Kitab Suci. Kalih prekawis punika ibaratipun makuthanipun Sang Trubusan. Mliginipun Kitab Suci; secara kronologi kawangun dening umatipun Sang Yehuwah adhedhasar kasektenipun Sang Roh Suci, dene ing babagan pigunanipun (fungsi-nipun) Kitab Suci tansah wonten ing tengah-tengah kita sadinten-dinten (punapa malih ingkang kagungan kitab Suci elektronik, ateges saben dinten Kitab Suci kaasto wonten ing tangan!) dados pangeling-eling kangge kita, bilih Sang Yehuwah punika tansah nunggil kaliyan kita. Kagem tiyang ingkang sregep maos lan nindhakaken Sabdanipun Sang Yehuwah ingkang kaserat ing Kitab Suci punika, sedaya prajanjinipun Sang Yehuwah bakal kawujud ing gesang kita (ay. 14). [Onewan]
“Sabdaning Sang Yehuwah ngrimati sagung dumadi, nuntun ing pepadhang kang sejati.“
