Tumrap kita, gesang ingkang dipun kersakaken dening Gusti Yesus, boten sanes inggih punika gesang ingkang wanuh saha mituhu dhumateng Pranatani-Pun. Gesang ingkang mbangun miturut kedah linambaraken dhateng raos ajrih-asih dhumateng Gusti, hangraosaken pangayoman peparingipun Gusti amrih gesang linuberan barkah katentreman saha karahayon. Pepancasan adi kalawau saged kagayuh sauger para kagunganipun Gusti Yesus sumadya nggladhi wanuh, adreng anggenipun mangun pangibadahipun wonten ing ngarsanipun Gusti.
Mawarni-warni tata cara tumrap kita mujudaken gesang ingkang sumuyud wontening rancanganipun Gusti, antawisipun inggih lumantar pangabekti, mirungganipun pangabekti ingkang kawangun sesarengan kaliyan para sadherek tunggil pitados lan pangajeng-ajeng katata kanthi titi salebeting tata urutan ingkang sinebut minangka tata panembah. Tata panembah punika minangka ijeman saking Tata Ibadah GKJW 2022. Mawarni-warni Tata Panembah ingkang kacawisaken antawisipun inggih punika: Wiwit Tata Panembah Minggu, Tata Panembah Kategorial, Tata Panembah Brayat, Tata Panembah Bujana Suci, lan sapanunggalanipun, kalebet Tata Panembah Khas/Mirunggan GKJW, lsp. Wondene, ingkang dados pepancasan mujudaken Tata Panembah punika boten sanes inggih linambaraken saking Program Pembangunan Jangka Menengah (PPJM) II GKJW, supados GKJW saged mujudaken tuwuhipun iman saha kapitadosan sangsaya ngrembaka, kalebet pangupadi ndherek nglestantunaken Basa Jawi lumantar Tata Panembah kados mekaten punika. Awit, kados ingkang kita mangretosi bilih Basa Jawi minangka Bahasa Ibu/Mother Tongue, dados basa ingkang kaagem minangka sarana mangun komunikasi wonten ing tlatah Jawi, mirungganipun wonten ing Jawi Wetan.
Sinaosa boten saged kita selaki bilih Basa Jawi karaosaken sangsaya mindhak dinten sangsaya kirang populer, awit sangsaya sakedhik cacahipun ingkang saged migunakaken Basa Jawi kanthi trep. Kawontenan punika boten lajeng ndadosaken nglokro utawi kendho salebeting ngupadi nglestantunaken warisan leluhur punika. Migunakaken Basa Jawi minangka sarana komunikasi, sacara mirunggan salebeting Tata Panembah saged kawastanan ugi minangka pangupadi nglestantunaken Basa Jawi. Pramila saking punika, kita saos sokur awit berkahipun Gusti, taksih pinaringan kalodhangan ndherek cecawe salebeting ngupadi murih Basa Jawi lestantun, lumantar Tata Panembah kanthi jarwan Basa Jawi punika.
Tata Panembah Greja Kristen Jawi Wetan 2023 dapat diunduh di sini.
Dukungan
Anda dapat mendukung pelayanan Penerbitan Majelis Agung GKJW melalui nomer Rek. BRI nomor 0051-01-004256-56-9 (atas nama PENERBITAN MAJELIS AGUNG GKJW) atau melalui QRIS dibawah ini.
